Más d'una trentena de ganaderíes participantes del Certame d'El Pieloro homenaxaron a Gabino González, alma mater del certame ganaderu carreñense, y a la so indixebrable compañera, dende fai 45 años, la so muyer Fifi.

Nun establecimientu de la contorna del Cabu Peñes celebraron el tradicional alcuentru añal de les ganaderíes participantes nel XXXVI CONCURSO EXPOSICIÓN DE GANÁU VACUNO D'EL PIELORO.

Nel intre de la velada les ganaderíes procedentes de los conceyos de Carreño, Corvera, Gozón, Avilés, Llanera, Cuideiru, Villaviciosa, Nava, Pravia, Uviéu y Murios del Nalón fixeron entrega d'una placa homenaxe a Gabino y un presente a la so muyer.

Desiré Álvarez y Carmen Junquera, la primera como vocera de les ganaderíes y la segunda, xuntu con Nuria López, dambes en representación de la mocedá de la parroquia que participa viviegamente na organización de los festexos populares, nel marcu de los que se celebra'l prestixosu certame, conducieron l'emotivu actu de reconocencia.

Gabino, nació en San Zabornín.  A los 8 años, xuntu cola so familia, deciden abandonar la casa natal en Carreño pa encamentase, al otru llau de la carretera del llugar que-y vio nacer, como a unos trescientos metros. Pasaron a vivir nunos terrenes yá pertenecientes al conceyu de Gozón. El so día ente día trescurre, dende entós al amparu de la Mancomunidá del Cabu Peñes, la vivienda familiar pertenez al conceyu de Gozón y les sos finques, que fueron mediu de vida de la so ganadería la mayoría, pertenecen al conceyu de Carreño.

“L'homenaxáu ye, que sepamos, de toa Asturies ye la persona que lleva más años al mandu de la organización de  un certame ganaderu, nesti casu'l de Carreño que se celebra tolos branos n'El Pieloro. De les 36 ediciones que tien el nuesu certame, Gabino namá se perdió cuatro d'elles. Ello foi por cuenta de la tráxica y irreparable perda d'un fíu. Un periodu nel que la familia González travesó duros momentos que con fortaleza, valentía y tesón, pasu ente pasu fueron superando hasta volver coyer el timón y siguir, como fixeron siempre, collaborando non yá col certame, sinón con toa aquella persona que s'avera a la so casa en busca d'ayuda. Oxalá la familia González, con Gabino al frente, nun se vea obligada nunca más a perdese nenguna edición más“  - espresó Amelia Fernández, Alcaldesa de Carreño.

La rexidora señaló públicamente nun conocer con antelación al mesmu l'homenaxe previstu. El cuál valoró como bien positivu porque surdió bonalmente del sector ganaderu que conoz bien la llabor que fai y la so vocación de serviciu a los demás. Asina mesmu concluyó señalando “ye bonu que faigamos esti actu de xusticia, de reconocencia, y d'honor. A quién con altor y eficacia lleva les riendes del certame de ganáu de Carreño. Y que esto se produza en momentos nos que puede esfrutalo dafechu y compartilo cola que ye la so gran familia, la ganadera”.

Les primeres ediciones del certame carreñense fixeronse nos praos de tras de la escuela y con ganáu del conceyu, pero adulces, foi coyendo fuerza y consolidándose hasta convertise nel concursu–esposición d'ámbitu rexonal. El d'El Pieloro acueye a ganaderíes de munchos conceyos d'Asturies y alluga más de 250 animales na cortil. Un certame col que tol vecinderu entórnase sumando'l so trabayu voluntariu pa tola loxística de les fiestes y dexando los terrenes ya instalaciones necesaries pal meyor confort de quien participen y visitantes.

Na última edición, la celebrada n'Agostu del añu pasáu participaron 45 ganaderíes procedentes de 15 conceyos asturianos (Nava, Ridadesella, Uviéu, Avilés, Gozón, Murios del Nalón,  Candamo, Pravia, Llanera, Corvera, Cuideiru, Salas, Xixón, Les Regueres y Carreño) .De les cuálos,  67 reses yeren  Asturiana de los Valles, 56 frisona y 127 de doble grupa.

“Gabino ye un home bonu, arrogante, xusto, complaciente, entrañable, complaciente, amigu de los sos amigos y de los sos vecinos o de cualquier persona que pueda precisar de la so ayuda. Una persona bien trabayadora, amiga, hasta onde los haya, del ganáu vacuno. Tal ye asina que en más d'una ocasión oyimos dicir a Fifi, la so muyer, que, dacuando, hasta a ella paez-y qu'ésti quier más a les vaquines que a ella. Mientres el certame, cada unu nel so puestu. el matrimoniu trabaya na organización, nun remacarien esfuerzos por que  nun falte detalle, por qu'atopemos a gustu y volvamos l'añu próximu a esfrutar d'El Pieloro. Como agradecimientu a esa llabor, pola promoción del ganáu vacuno y pol impulsu que cada añu da al certame apurrímoslu esta placa a Gabino y pa Fifi estes flores n'alcordanza a la so callada llabor ayudando al so home por que tou sala bien” – espresó Desiré en nome de les ganaderíes.

Casi un centenar de persones dieron cita na cena añal que, anguaño, cuntó con esti homenaxe sorpresa de los ganaderos.

En representación del Gobiernu del Principáu allegó, Ibo Álvarez González, Director Xeneral de Ganadería.  Tampoco faltó a la cita, José Manuel González,  Presidente de l'Asociación Española de criadores de ganáu vacuno selectu de la raza Asturiana de los Valles (ASEAVA).

L'homenaxáu, cola voz entecortada pola emoción, estimó toles amueses d'apreciu de les ganaderíes , según a toles persones y entidaes que collaboren col certame y les fiestes. Y concluyó afirmando que guardaría toles amueses d'apreciu recibíes y l'alcordanza del día como una ayalga.

La xornada concluyó con una improvisada sesión de tonada cantada por unu de los asistentes.