“Haití en el camino” recueye una serie d'instantánees na realidá que vive la población del país tres los desastres naturales.

Del llunes, 16 d'Ochobre hasta'l domingu 29, vamos poder esfrutar en Candás de la esposición Haití en el Camino.

Una amuesa fotográfica del xixonés Alejandro Zapico proporcionada pa la ocasión pola Axencia de Cooperación al Desenvolvimientu del Principáu, propietaria de l'amuesa.

«Ye una esposición de muncha calidá que tamos encantaos de poder amosar en Carreño gracies a la collaboración de Gobiernu del Principáu y la Federación Asturiana de Conceyos», espresó la concejala de Bienestar Social, Cecilia Tascón.

 L'amuesa yá tuvo montada n'otres sales d'arte asturianu.

«El 80 per cientu del trabayu de los fotoperiodistes ye buscase la vida y atopar la fórmula pa compartir la hestoria que t'interesa» - señaló Álex Zapico, qu'acompañó nun vuelu a Bomberos Ensin Fronteres y pudo comprobar el trabayu que realicen n'Haití montando pozos d'agua pa poder atayar la meyora del cólera. 

«Esta esposición  va dexar que la población de Carreño conoza y avérese  a la realidá d'Haití, unu de los 25 países  más probes del mundu  que s'atopa nuna situación de probeza ya inseguridá alarmante, situación que nun fixo más qu'amontase col pasu del furacán Matthew n'Ochobre del añu pasáu» –señaló la conceyala de Bienestar.

La esposición va poder visitase nel Centru Polivalente la Baragaña de Candás, del 16 al 29 d'Ochobre, de llunes a vienres de 9 a 22 h., y sábadu, Domingos y festivos de 10 a 13h., y de 16:30 a 21h.