La Policía Local de Carreño imparte formación en seguridá pa
persones adultes con discapacidá de la contorna. A les distintes
actividaes de calter social que impulsa y empresten los
axentes de Policía Local del Conceyu de Carreño, a lo llargo de los
años, como les xornaes de puertes abiertes, campañes de
sensibilización na comunidá educativa, visites a les sos
dependencies, etc hai que suma-y una nueva iniciativa
qu'empiezó güei. El so oxetivu facilitar la protección
y seguridá de les persones con esta discapacidá intelectual de la
contorna del Cabu Peñes. La primer sesión formativa lleva por
títulu “CAMINANDO SEGUR@S POLA VIDA” ya impartióse nel
Centru polivalente La Baragaña.
“Caminando Segur@s pola Vida” ye un primer taller
específicamente dirixíu a les persones usuaries del Centru de
Sofitu a la Integración (CAI) de Candás. Ye un proyectu ellaborao y
desenvuelto pola Policía Local. L'encargáu d'impartilo ye l'axente
local Antonio J. Molina.
“Esta iniciativa realízase nel marcu del Conveniu de
Collaboración estable suscritu ente'l Conceyu de Carreño y l'entidá
que, por encomienda del Principáu, xestiona'l Centru (la Fundación
FASAD). Al traviés del cual les persones usuaries del centru
pueden aportar a los espacios municipales y participar de la vida
cultural, social, deportiva del Conceyu. Asina, por casu
incorporáronse cursos pal colectivu con diversidá funcional na
ufierta d'estensión cultural municipal; nel ámbitu de les nueves
tecnoloxíes, el CDTL vien desenvolviendo'l programa “Tics na
Diversidá”, dirixíu a consiguir la integración plena de 13
usuarios/es del centru; no deportivo púnxose en marcha xuntu col
club “Cuatros Vientos” de Candás la iniciativa de vela adaptada
o la participación nos talleres de pesca o l'usu de les
instalaciones de la piscina de la Mancomunidá del Cabu Peñes; amás
de la participación nes activiades que desenvuelven los Patronatos
del Teatru Prendes y Muséu Antón, ente otres” – señaló
l'Alcaldesa, Amelia Fernández.
El Taller dio empiezu güei martes 19 de xunu a les
11:00 hores nes instalaciones del CDTL. Nesta primer sesión
trabayóse coles persones qu'alleguen al Centru les distintes
situaciones nes qu'intervengan la seguridá como tema global pa
llegar al conceutu de peligru y saber cómo actuar. Pa ello trés van
ser les temes a aldericar:
· Riesgos, analizando
los posibles riesgos, como evitalos, onde s'atopen.
· Daños y los cuidos
necesarios pa reparar o restituyir esos daños.
· Peligros, van vese los
distintos tipos y como pueden detectalos a tiempu, situaciones
reales,…
Les siguientes sesiones van tratar sobre la conocencia personal.
va analizase si conocen los sos datos personales (DNI, teléfonu,
dirección,..), la documentación que tienen de llevar na so
cartera, conocencia del mediu nel que viven (ciudá, villa, pueblu,
barriu,…), identificación de too aquello que los arrodia, cais,
places, parques, pasos de peatones, edificios públicos, privaos, los
recursos municipales,…
“Reforzamos la collaboración ente servicios públicos pa
facilitar la protección y seguridá de les persones con esta
discapacidá intelectual. Les actividaes programaes escuerren la
meyora de la protección y la seguridá d'esti colectivu y la
promoción de la so integración na sociedá. Vamos Impulsar diverses
actividaes de formación, a lo llargo del añu, pa fomentar la
sensibilización al respective de la protección frente al abusu y
los posibles delitos que pudieren cometese contra estes persones.
L'axente que va impartir la formación, amás de la cualificación
profesional, conoz de bien cerca les característiques de les
persones con discapacidá intelectual y cómo encarar situaciones
d'especial vulnerabilidá. La so esperiencia personal respuende pa
da-yos visibilidá, facilita-yos la so participación en distintes
actividaes de sensibilización y eventos d'acercamientu a la
institución policial. Tou ello, cola cuenta de reforzar la
protección de les persones más desfavorecíes o en riesgu
d'esclusión” – añedió Fernández.
“Al tratase d'un programa piloto nesti conceyu, y que se
desenvuelve específicamente pa usuarios/es d'esti Centru al
qu'alleguen persones de Gozón y Carreño, puede que tenga dalguna
variación del conteníu de les sesiones. Según váiganse
viendo les necesidaes y/o l'interés de participantes nes
actividaes y la comprensión de los conceutos que se van a
intentar tresmitir les temes a tratar van dir variando y afaciéndose
a les sos necesidaes. Con esti proyectu lo que queremos consiguir ye
que ganen autonomía y facelo de forma segura. Qu'en el casu de que
vean un peligru pa la so persona puedan identificalo y actuar. Qu'en
tou momentu lleven consigo la so identificación por si nun
casu puntual precisen ayuda” - comentó Antonio Molina,
axente númberu 17 ya instructor del Taller.
“El taller nun ye namá teoría, si non que la programación
va ampliasecon distintes propuestes de salíes a otres ciudaes y
distintes actividaes práctiques que doten la so esperiencia y meyor
conocencia a quién participen nel mesmu” concluyó
Molina.