Na última Comisión de Facienda
aldericóse'l proyectu de presupuestos del gobiernu municipal
previstu pa 2018 y va celebrase una segunda comisión el llunes, día
18 de Xunu. Esta selmana va prosiguir la ronda de negociaciones ente
les fuerces polítiques con representación en Carreño.
“El proyectu de presupuestos va
algamar previsiblemente los 14.107.838,20 millones d'euros y amuesa
una vegada más el balance positivu de la xestión económica que'l
Gobiernu Socialista llevó a cabu nel conceyu de Carreño. Trátase
d'un proyectu equilibráu que da respuesta a les principales
necesidaes del conceyu”, señaló Amelia Fernández, Alcaldesa
de Carreño.
“Una vegada aplicaes les
llimitaciones del techu de gastu que nos impuso el Gobiernu d'España,
Carreño queda con una capacidá inversora (capítulu VI) que xube a
671.934 euros. De los cualos, un 35 per cientu, 235.176,9 euros van
destinase a les iniciatives que cuntaron con más sofitos nel procesu
de presupuestos participativos y que tienen que ver con meyores nes
instalaciones deportives de Candás y la zona rural, y con un local
p'almacenaxe de materiales de les entidaes que realicen festexos na
redolada del Centru d'Iniciativa Rural Monte Areo”, añedió
l'Alcaldesa.
“Hai que destacar, nel marcu
del capítulu unu, relativu al personal, l'esfuerzu realizáu
mientres esta llexislatura en relación a la meyora de les
condiciones llaborales y salariales de les persones emplegaes
públiques municipales. Ta peracabándose la revisión de los
allegamientos realizaos a la RPT ( Relación de Puestos de Trabayu)
elementu que revierte directamente na meyora de la calidá de los
servicios qu'empresta'l conceyu al vecinderu de Carreño”
- esplicó Amelia Fernández.
“Nel marcu d'esti presupuestu
prevemos reforzar el serviciu d'obres cola contratación de 5
operarios y operaries per acumuladura de xeres. Según la renovación
del parque de maquinaria esistente pa lo que se van destinar más de
cien mil euros. Contémplase l'alquisición d'un tractor porque'l
municipal vien dando munchos problemes d'averíes, segadora y otros
vehículos necesarios pa ganar eficiencia”, esplicó la
rexidora.
“Al caltenimientu
d'infraestructures y víes urbanes de Candás prevese destinar 47.500
euros, tamién s'habilitó una partida específica pa la renovación
de moblame urbanu na villa de más de 40 mil euros, 200.000 euros van
suponer les inversiones recoyíes nel Plan Integral de la Zona Rural
y el proyectu de presupuestu tamién recueye les previsiones de
cofinanciamientu de les meyora de les árees industriales, como pieza
clave del desenvolvimientu sostenible del conceyu. Nesti casu
encetará'l plan de seguridá de Falmuria y el d'accesibilidá de
Tabaza”, anunció l'Alcaldesa de Carreño.
“Amás de les inversiones
que se van contemplar nel Plan Integral de la Zona Rural, como'l
muriu de contención na zona de Monterriundo y d'otres actuaciones en
materia d'infraestructures, cobra importancia la inversión en
cultura y deporte. D'esta forma refuérzase'l papel de los patronatos
deportivu y Teatru Prendes col fin de garantizar el caltenimientu de
los servicios qu'empresten a la ciudadanía y l'actividá d'entidaes
venceyaes, como pueden ser les Bandes de Música y Gaites de Candás”,
señaló la primera edil.
“Va encetase la construcción
de l'aula de psicomotricidá que va ameyorar les instalaciones de la
Escuela de 0 a 3 años y la primer fase, de la Factoría Musical de
Carrió, proyectu ésti postreru que nun pudo executase, hasta la
fecha, al nun tener los preceptivos permisos de les entidaes
llindantes” – añedió Fernández.
“Otres polítiques coles que
dende'l Partíu Socialista caltenemos el compromisu son la
medioambiental (instalación y analís de datos d'estación de
midida), la convocatoria d'ayudes públiques en concurrencia
competitiva p'ayudar los as propietarios/as col arreglu d'horros y
paneres, según la de recuperación de la memoria histórica”,
concluyó l'Alcaldesa de Carreño.