Entamu del serviciu de salvamentu nes sableres de Carreño

Esti sábadu, día 16 de xunu, va dar empiezu'l salvamentu de sableres 2018. Tres el correspondiente procesu de contratación nel Conceyu de Carreño, nel que participaron 3 empreses, axudicóse'l mesmu pol valor de 149.725,4 €. La empresa axudicataria resultó EBONE SERVICIOS DE EDUCACIÓN Y DEPORTE, SL.

El serviciu de salvamentu en Carreño va dar cobertoria diaria a les sableres de Palmera, Huelgues, Carranques y Xivares n'horariu de 11:30 a 19:30 h. Esti serviciu va desenvolvese dende'l sábadu 16 de xunu al Domingu 16 de setiembre y va tar compuestu por 25 persones. 22 d'elles van faer les llabores de socorristes, 2 patrones en cobertoria diaria de 11:30 a 19:30 hores pa la embarcación y 1 coordinador del salvamentu de les sableres del Conceyu tamién en cobertoria diaria de 11:30 a 19:30 hores.

Dientro del serviciu contratáu vamos acometer, per segundu añu consecutivu'l programa Un Mar Ensin Barreres, el cuál facilita, previa reserva, una atención na sablera de Palmera más integral y polivalente. Esta atención ta enfocada a les persones con diversidá funcional según la so discapacidá, persones mayores, o persones con movilidá amenorgada, col fin de facilita-yos, tamién a les sos families, l'usu y esfrute de la sablera incluyíu'l bañu. Trátase d'intervenciones específiques que favorecen la inclusión social na redolada como'l desenvolvimientu de la so autonomía personal. Esti Serviciu sería realizáu, a partir de la próxima selmana, siempres con cita previa y reserva alcordada, los xueves, vienres, fines de selmana y díes Festivos. Estos sofitos tendríen una duración de 60 min. por persona y día. Emprestaríense, nos díes señalaos, n'horariu de 11,30 a 19,30 h.” -señaló Onésimo Velasco, conceyal de sableres.