Na mañana d'esti xueves 14 de xunu
tuvo llugar nel Edificiu del Náuticu “Amando Prendes” la
presentación d'una nueva temporada de les visites teatralizaes
per Candás “Jovellanos y Ellas”.
A la presentación allegaron Gemma de
Luis, Directora del espectáculu los actores Carlos Alba y
Félix Corcuera caracterizaos nos sos papeles de Carlos González
Posada y Xovellanos respectivamente; y per parte del Conceyu de
Carreño Paula Cuervo, Conceyala de turismu
Esta nueva edición, que va ser la
tercera, va desenvolvese en dellos espacios de la villa
marinera contemplando como años anteriores trés funciones, y
como novedá un fin de fiesta cola celebración d'una Fiesta
Xovellanista nel puertu local.
Trés van ser los díes señalaos pa
les funciones empezando'l próximu sábadu 16 de xunu a les 19
hores cola llegada a la dársena del muelle local en barca de
“Xovellanos” , el cuál respuende a la invitación cursada pol so
amigu, Carlos González Posada, pa pasar una tarde de branu
nel pueblu natal del sacerdote candasín.
Les siguientes funciones van ser el
sábadu 14 de xunetu a les 19 hores; el domingu 9 de setiembre a les
12 hores, siguida de fin de fiesta nel muelle a les 14 h..
La compañía “La Tejedora de Sueños”
cola dirección de Gemma de Luis, va ser la encargada de
da-y forma al percorríu polos llugares más emblemáticos
de Candás. Va Ser la encargada de dirixir y supervisar el
trabayu d'un equipu formáu por 5 actores y actrices, 8 profesionales
de la música y 3 persones encargaes de la parte técnica de les
representaciones.
“Delles son les novedaes d'esta
tercer edición ente elles hai unos cambeos d'escenarios,
incorporamos por casu la cai Gabiana o'l mesmu muelle local
con la llegada de Xovellanos en barcu. Otra de les novedaes
ye que na mañana del día de la representación, un trovador montáu
a caballu va anunciar al vecinderu de la Villa lo que va soceder
poles sos cais más tarde. N'anteriores ediciones los actores y les
actrices esplicaben al públicu la obra pa de siguío metese nel so
personaxe. Pos esto camudó, dende'l principiu de la obra los actores
y actrices yá son el so personaxe” señaló Gemma de
Luis-Directora de la obra.
Les visites, que la so duración
envalórase sía d'una hora y media, van arrincar nel muelle local
cola llegada en barca de Xovellanos y na dársena interior va
tar esperándolo Carlos González Posada. Pa siguir poles
cais Gabiana-Santolaya-La Estrecha, El Paseín, les cais
Rufo Rendueles, Braulio Busto pa rematar na Plaza de la Baragaña.
Pero Xovellanos nun va llegar namá a
la Villa, si non que-y acompañen les muyeres de la so vida, la so
madre Doña Francisca; la so hermana Xosefa; y una bien bona amiga,
la Condesa de Montijo. Tres la llegada de Xovellanos, los dos amigos
van empecipiar un paséu nel que *interaccionarán coles rederes,
coles conserveres nel Paseín, delantre de l'Antigua Fábrica
d'Ortiz, van cuntar anécdotes y pasaxes de la so vida mientres
percuerren los espacios más emblemáticos del Candás marineru
d'antaño, p'acabar danciando, xuntu col vecinderu, la Danza Prima.
L'elencu d'actores y actrices va tar
encabezáu por Félix Corcuera nel papel de Melchor *Gaspar de
Xovellanos, pero amás va cuntase con:
• Carlos Cellero nel
papel del sacerdote candasín Carlos González Posada.
• Carolina Trancón nel papel de
Josefa de Xovellanos, hermana del protagonista.
• Verónica Gutiérrez,
la candasina va interpretar a Doña Francisca, madre de
Xovellanos.
• Mayra Fernández nel papel de
la Condesa de Montijo, amiga íntima del ilustráu asturianu.
“Xovellanos y Elles nun ye namá
una obra de teatru na cai, si non que ye una forma na que les
persones que nos visiten esos díes afayen un Candás distintu,
afayen a les sos xentes y tradiciones. Un añu más vamos
siguir cuntando con la inestimable collaboración de
Maria Esther Vega, cola so dirección el grupu de Danza
Prima Popular de Candás van faenos esfrutar coles sos
voces al ritmu d'esa danza tan peculiar como ye la Danza Prima; el
Grupu de Teatru “LesAyalgues” de Carreño va faenos recordar con
señardá a aquelles muyeres qu'ayudaben a la economía familiar
trabayando nes fábriques de conserva o salazón o se dedicaben a un
arte casi n'estinción como ye l'arte de coser redes; asina mesmu
l'alumnáu de la Escuela Municipal de Música “Miguel Barrosa” de
Carreño, col Conxuntu de Cámara, cola dirección de David
Coláu y Begoña Vázquez van ser los encargaos de poner el
toque musical a les representaciones” comentó Paula
Cuervo-Conceyala de Turismu.