Carreño, lluminosu y eficiente: 800.000 euros pa substitución de lluminaries por lluces LED en Candás

L'Ayuntamientu de Carreño va recibir del Ministeriu pa la Transición Ecolóxica casi 800.000 € d'ayuda estatal pa la sustitución por llámpares LED de les lluminaries de la villa de Candás

El Conceyu de Carreño foi escoyíu pa la implantación d'un proyectu singular pa facilitar el pasu a una economía baxa en carbonu nel ámbitu de les Entidaes locales españoles. 

El proyectu, pal que s'acaba d'aprobar una subvención de 798.588 € (equivalente al 80% de la inversión total prevista), va consistir nes sustitución de les lluminaries esistentes nel allumáu públicu de la villa de Candás por lluminaries LED (1.819 puntos de lluz), y na actualización de 44 cuadros de mandu de dichu allumáu. Envalórase que con estes actuaciones llograráse un aforru enerxético del 77%.

El procesu de sustitución de les lluminaries va tener una duración máxima de 30 meses, y prevese que suponga una inversión total de 998.234,70 €.

Esti proyectu va ser financiáu pol Institutu pa la Diversificación y l'Aforru Enerxético (IDAE), organismu adscritu al Ministeriu pa la Transición Ecolóxica, al traviés de la Secretaría d'Estáu d'Enerxía, de quien depende orgánicamente. L'ayuda que se-y concede a Carreño enmárcase dientro del Programa Operativu de Crecedera Sostenible 2014-2020, financiáu polos Fondos FEDER. Por aciu la puesta en marcha d'esti tipu de proyectos singulares, pretende consiguise una amenorgamientu de les emisiones de dióxidu de carbonu a l'atmósfera, por aciu la meyora de la eficiencia enerxética (como nel casu del proyectu de Carreño), la movilidá urbana sostenible, o l'usu de fontes d'enerxía anovables.

El Conceyu tien que financiar el 20 % del proyectu, que xube a 199.646,70.-€. Trátase d'una inversión que puede financiase como inversión sostenible.

L'ayuda tien que ser aceptada nel plazu máximu de 30 díes naturales dende la fecha de recepción del resolvimientu. Nel plazu máximu de 6 meses, dende la notificación del resolvimientu de concesión de l'ayuda, el consistoriu tendrá d'acreditar empecipiar la tramitación de los procedimientos de contratación de los suministros, obres y servicios necesarios pa la execución de les actuaciones previstes.