El consistoriu carreñense fai una llamada a la collaboración
ciudadana por que, aquelles families que tengan una manta antigua de
les sos güeles, faciliten el so estudiu. Los díes 21 y 22 de
Setiembre va tar nel Centru polivalente “La Baragaña”
l'antropóloga ya historiadora que realiza l'estudiu pal
Conceyu. Preténdese que pueda tomar fotografíes y analizar les
pieces más antigües en visu a peracabar l'estudiu contratáu.
“Dáu'l calter específicu que reviste la manta candasina”,
el so presumible espardimientu na vestimienta tradicional d'otres
villes d'Asturies, y lo escaso de la bibliografía científica
sobro'l so orixe y significáu, el Conceyu de Carreño consideró
d'interés, al traviés de la Conceyalía de Cultura, el dar en la
contratación esterna d'una asesoría etnográfica ya histórica, pa
la ellaboración d'un estudiu científicu monográficu sobro l'orixe
ya interés históricu y cultural de la manta candasina, según la
definición de la fórmula más fayadiza pa la protección d'esta
amuesa del Patrimoniu cultural local” – esplicó Amelia
Fernández, Alcaldesa de Carreño
L'axudicataria d'esta asesoría, tres el correspondiente procesu
de llicitación resultó ser l'antropóloga ya historiadora Fe
Santoveña Zapatero. L'estudiu, va constar d'una memoria detallada
acompañada de los anexos que lu acrediten y que dexe la solicitú
municipal de incoación d'espediente pa la so protección cultural
énte alministración correspondiente. Al términu del mesmu
realizaráse una presentación pública y/o una conferencia
divulgativa abierta al públicu pa la so divulgación y promoción.
El consistoriu carreñense pide por ello collaboración vecinal
por que les pieces más antigües puedan ser estudiaes por Fe
Santoveña, a tal fin, va tar en Candás los díes 21 y 22 de
Setiembre nel Centru polivalente “La Baragaña”. Los horarios nos
que podrá collaborase nesti estudiu son el Sábadu, día 21 pela
tarde de 16:30 a 20:30 h. y el Domingu, de 10:30 a 13 hores. Si por
dalgún motivu tiense una manta y nun pudiera allegar nos díes y
horarios señalaos atenderíase la collaboración dende la Conceyalía
de Cultural contactando directamente col Conceyu
L'estudiu encargáu pol Conceyu va rematar cola ellaboración d'un
informe técnicu sobro l'orixe históricu del cobertor candasín. Que
va incluyir una introducción sobro'l cobertor candasín como bien
d'interés cultural. Según una descripción física del oxetu a
protexer: colores, materiales y factures. El puntu de crochet. El
texíu de les xentes humildes. El cobertor candasín: ergoloxía,
colores, y usos. Tamién va contemplar un apartáu col entamu de la
hestoria de la industrialización n'Asturies, les conserveres en
Candás, faciendo un percorríu pol traxe asturianu y modes
populares, la fixación d'un traxe identitariu, la moda nes clases
populares 1899-1920 y la toquía como prinda femenina (usu ordinariu
y usu como prienda de prestíu). Va Haber otru estremáu “La muyer
y el mar” nel que va analizar el trabayu continuu nes xeres
marineres, la figura de armadores y empresaries (muyeres de posición
acomodada y modes burgueses), les conserveres (muyeres de trabayu
asalariáu y les modes de les clases populares urbanes) y les
sardineres. Otru epígrafe que va contemplar l'estudiu ye la
continuidá y desusu de la manta candasina nel sieglu XX, les nueves
realidaes, antigües modes, los cambeos sociales nel entamu de la
democracia y les festividaes nos entamos de la democracia. Va
Analizar tamién el papel de les peñes marineres na fixación d'un
vestuariu. Y la reconocencia popular de la manta candasina como
elementu d'identidá local: vistise pa la fiesta y vistise de
candasina.
Albandi
