No que fai a les informaciones
publicaes nel día d'ayeri referentes a la denuncia d'una vecina de
Carreño, dende'l grupu municipal socialista entendemos que se trata
d'una nueva maniobra con clara intencionalidá política na campaña
de descreitu que vien desenvolviendo parte de la oposición al
gobiernu local.
Rescampla que se sofiten nuna
conversación informal caltenida pol conceyal y la vecina
comenenciuda nuna cafetería de Candás y nun clima d'enfotu, que se
saca totalmente de contestu col únicu oxetivu d'esviar l'atención
sobre les opciones de solución plantegaes dende'l gobiernu local al
problema que denuncia esta persona.
Col principal fin d'avanzar en resolver
el pagu de los servicios emprestaos al Conceyu de Carreño, el
conceyal de primeres plantegó-y -nesa conversación informal-
daqué que, como puede probar el mesmu provisor y l'intervención
municipal, nun se llevó nunca a efectu. Lo que'l conceyal realmente
treslladó-y a la guardería canina, col debíu asesoramientu llegal,
foi que, en tanto'l consistoriu nun pudiera paga-y, xestionara un
factoring o otra fórmula más conveniente cola so entidá bancaria.
Ye llamentable que dende'l Partíu
Popular de Carreño, sucursal del PP del fraude y la corrupción
representaos lo que ye güei nel so máximu responsable, calténgase
una actitú tan cobarde, qu'amás utiliza ensin vergüenza nenguna
les dificultaes que traviesa nesti casu una vecina, non pa intentar
resolveles, sinón p'acometer una vegada más contra'l gobiernu
local.
Efectivamente débese-y un dineru a
dichu provisor guardería canina del conceyu por importe de 15.722,87
euros correspondientes al exerciciu 2017. Delda que deriva de la
necesidá de cumplir la obligación municipal recoyida na Llei que
rixe la tenencia y protección de los animales domésticos nel
Principáu d'Asturies, los Conceyos, al nun disponer esti consistoriu
d'un centru de depósitu d'animales pa recoyer y caltener perros y
gatos que s'atopen abandonaos o errantes hasta'l términu de los
plazos fitos nel artículu 18 de la Llei. Fuéronse recoyendo estos
animales nuna Guardería canina qu'esiste nel conceyu. Al par que
realizamos campañes d'adopción que los sos resultaos tán visibles
na web municipal (Ver https://www.ayto-carreno.es/adoptados/as).
Dicha guardería foi facturando pola prestación d'estos servicios.
Facturación que varió en función del númberu d'abandonos cada
añalidá, dato primeramente malo de predicir nun presupuestu añal.
Amás na busca de soluciones definitives pa cumplir coles
obligaciones municipales el día 14 de xunetu de 2017 el Conceyu
formalizó la firma d'un Conveniu Interadministrativu ente dellos
conceyos de la rexón, de formar parte del proyectu de creación d'un
Consorciu pa la Prestación del Serviciu de Recoyida y Albergue
d'animales Domésticos Abandonaos nos términos municipales
implicaos. Los Estatutos de dichu consorciu aprobáronse
definitivamente en BOPA 39 de 16 de febreru de 2018. Dichu Consorciu
entá nun ta en disposición d'empezar a emprestar el serviciu
pretendíu, nin esisten previsiones, a curtiu/mediu plazu de que-y
les puedan realizar.
El serviciu de recoyida y depósitu
d'animales en Carreño tase licitando nestos momentos, el plazu pa
presentar ufiertes conclúi'l próximu vienres a les 23:59 hores.
Enllaz al procesu de llicitación:
L'equipu de gobiernu trató en tou
momentu de faer frente a esos pagos cola guardería llevándolo a dos
plenos como reconocencia extra xudicial (plenos de Xunu y Xunetu).
Siendo votáu en contra dichu reconocencia por otros grupos políticos
ente los que s'atopa precisamente'l Partíu Popular.
Albandi
