El Conceyu de Carreño axudicó les obres
d'arreglu de dellos viales dos caminos públicos C-191/C-190 na
parroquia de Llorgozana, tres el correspondiente procesu de
llicitación, a la empresa Pavitek 2010, S.L. por importe de 52.016,07 € IVA incluyíu.
“L'oxetu de les obres que se van encetar
dende la Conceyalía de Mediu rural son relatives al arreglu del
Camín Cabodevilla C190 y un tramu del Camín C191. Dichos caminos
presenten un firme asfálticu bastante deterioráu pola acción de
les agües de escorrentía superficial, presentando numberosos
baches, descarnes y material desprendío, amás de que los sos cantos
fueron tomaos pola vexetación axacente restándo-yos anchu a los
mesmos” – afirmó'l conceyal Manuel
Noceda.
“Amás nel camín C191, esiste una turria en
desmonte, dixebrándolo d'otru vial superior, que presenta
desprendimientos que lleguen a afectar al firme del segundu, teniendo
fundimientos y y inclusive en dalgún puntu, llegando a quedar ensin
sofitu, lo que representa un riesgu pal vecinderu. Amás, el desnivel
esistente ente dambos viales, que llega a superar los 2,5m d'altor,
escarez d'elementos de protección frente a posibles cayíes de
vehículos. Con esta actuación del consistoriu preténdese
sobremanera asfaltar el camín C190 na so totalidá, lo que supon un
llargor 257,50 m, y un tramu de 267,50 m del C191, ameyorando'l so
sistema de drenaxe pa evitar que se sigan deteriorando; y amás
contener la turria que se ta desestabilizando” – añedió'l
conceyal.
Pa dar solución a la turria inestable de más
de 2,5 m d'altor, qu'amás ta sosteniendo otru vial, proyectóse la
construcción d'un muriu en ménsula de formigón armáu, que va
llevar na parte alta del so alzáu, una barrera de seguridá bionda,
pa protexer al tráficu del vial cimeru, de posibles cayíes d'altor.
Dichu muriu va tener trés tramos, llevando xuntes de dilatación y
mechinales a una distancia máxima de 5m y 2,5 m respectivamente.
Na turria que dixebra los dos caminos esiste un
poste d'allumáu y otros servicios que se previo caltener nel mesmu
sitiu una vegada que se construya'l muriu; va ser necesariu
encontialo y xixilar la so estabilidá mientres se realiza dicha
obra.
Al respective de la pavimentación proyectóse
con 5 cm d'espesura d'amiestu bituminoso en caliente tipu formigón
bituminosu AC 16 Surf D 50/70. Solo vase a pavimentar l'anchu actual
de los viales, ensin llevar a cabu ensanche de llaterales.
“Pa poder llevar a cabu la pavimentación
d'estos caminos va ser necesariu primero faer una llimpieza de los
mesmos y de los sos cantos, yá que s'atopen abondo tomaos pola
vexetación amiesta. Considérase nel presupuestu llimpiar tol anchu
de los mesmos más una franxa d'unos 50 cm d'anchu mediu a cada llau
d'estos y les cunetes esistentes. Antes de llevar a cabu la
pavimentación, va dase na reparación de los baches esistentes.
Esiste una zona onde va ser necesariu fresar el firme antes de faer
l'asfaltáu, pa evitar superar el nivel de les entraes a una
propiedá” – afirmó Noceda.
“Los viales anguaño tienen delles cunetes
en tierra; con esta actuación municipal prevese non solo
sustituyiles por cunetes-bordiellu o cunetes en “V” de formigón
según el casu, sinón tamién faer cunetes nueves en tramos que
nesti momentu nun disponen d'elles. Tamién se preve l'allugamientu
d'una canaleta con rexes pa dar continuidá a la cuneta na
intersección con un camín y l'instalación d'un nuevu cañu pa
cruciar el Camín C191” – concluyó'l conceyal.