Esta mañana, a les dolce hores, nel salón de plenos del Ayto. de
Carreño presentóse la campaña pilotu de recoyida de materia
orgánica que s'impulsa cola collaboración de COGERSA y la
Conseyería. Na presentación participó'l xerente del
consorciu, Santiago Fernández, el Viceconseyeru de medioambiente,
Benigno Fernández, l'Alcaldesa de Carreño, Amelia Fernández,
acompañada de la técnica de medioambiente, Laura Rodríguez y
conceyales del gobiernu local.
El primer día de recoyida en cubos marrones ye este 18 de
Setiembre como anunció el consistoriu. Les borrafes d'orgánica
tendrán de depositase en bolses nos cubos, yá que COGERSA
recibe y dixebra les bolses de la materia orgánica.
Paralelamente, a partir del mes d'Ochobre ampliaráse la recoyida
de fracción orgánica cola instalación de contenedores que van
disponer d'una llave pal depósitu d'estes borrafes. D'esta forma, el
vecinderu va tener a la so disposición toos los díes de la selmana
los contenedores marrones específicos pa materia orgánica
d'apertura por aciu llave nes cais de Candás, y los martes y los
vienres cubos marrones delantre de la to vivienda. Los llunes,
miércoles, xueves, sábados y domingos caltiense l'actual sistema de
recoyida por aciu cubos negros puerta a puerta namá pa la fracción
resto.
Esta Corporación tuvo dende siempres un firme compromisu col
reciclaxe y la correcta xestión de les borrafes pa la meyora de la
nuesa redolada y convertir les borrafes en fonte de vida. Tenemos de
felicitanos pel camín percorríu, anque, inda, quédanos enforma por
faer en visu a cumplir cola normativa europea qu'obliga a que, nel
añu 2020, siquier el 50 % de les borrafes del conceyu sían
reciclaes frente al 16 % actual. Pa consiguilo tenemos qu'actuar yá
y faelo de forma conxunta.
Col firme propósitu d'avanzar un pasu más nel camín de ser un
conceyu responsable col mediu ambiente ampliamos el serviciu de
recoyida de basures qu'hasta agora s'emprestaba na villa urbana pa
impulsar el reciclaje de la materia orgánico. Ente los beneficios
que vamos poder consiguir si dixebramos correutamente la materia
orgánico atópense:
Evitar que vaiga al vertideru'l 40% del conteníu de cada bolsa de
basura y amontar el reciclaxe.
Amenorgar les emisiones de CO2 y otros gases d'efectu
invernaderu.
Tresformar la materia orgánica n'enerxía llimpia o compost.
Ameyorar la sostenibilidá de la nuesa redolada.
Estos cuatro oxetivos espliquen la trescendencia d'implicase como
vecín o vecina nesta recoyida selectiva. La participación vecinal
va ser clave pa contribuyir a amenorgar la cantidá de borrafes
xeneraes ya implementar polítiques que dexen la valorización y
aprovechamientu de los mesmos pa otros usos. Na web municipal puedes
descargar con tola información de cómo xuntase a la mesma según
l'allugamientu y horariu de los puntos informativos onde, nel casu de
sumate, van facilitate la llave pal depósitu de les borrafes nos
contenedores marrones de la vía pública que se van instalar, a
partir d'Ochobre, y un cubu marrón pa facilitar l'almacenamientu
d'estos na to casa.
Albandi
