Les entidaes vecinales de Tamón treslladaron al gobiernu municipal, al entamu de la llexislatura, los problemes d'agua por filtraciones na zona del pasu inferior de l'autopista A-8 na cai La Vega na parroquia de Tamón. Un problema que venía de llueñe ensin encetar l'alministración central solución dalguna.

“La presencia continua d'agua na calzada xenera los riesgos consiguientes na circulación de los vehículos y afecta a la seguridá de peatones que van escontra'l Centru d'Iniciativa Rural, la Ilesia y el campusantu. Tanto les entidaes vecinales como'l Consistoriu dirixímonos a lo llargo d'esta llexislatura a la Demarcación de Carreteres del Estáu n'Asturies, al ser esti organismu'l titular de l'autopista, que ye d'onde proceden les agües pola so mala canalización”- señaló Manuel Noceda, edil de mediu rural.

“El 25 d'abril de 2017 solicitóse una xunta ente'l Xefe del Serviciu de Caltenimientu y Esplotación de la Demarcación de Carreteres del Estáu, y representantes municipales, en visu a buscar una solución al problema. Dempués de los escritos y llamaes, l'anterior gobiernu nunca atendió los nuesos pidimientos. Nin siquier recibiéronnos”- señaló'l conceyal.

A partir d'esti momentu, y énte la falta de contestación, siguió demandándose, al traviés conversaciones telefóniques cola Demarcación, la fecha pa la xunta onde tratar l'asuntu colos responsables de Fomentu. Esto realizóse insistentemente dende noviembre de 2017 hasta la entrada del nuevu Gobiernu d'España presidíu por Pedro Sánchez.

“Finalmente, coincidiendo cola nueva presidencia del Gobiernu d'España, danse los primeros pasos pa la so solución. Dende Fomentu yá tán faciendo les obres necesaries pa recoyer les agües na ponte y ameyorando l'accesibilidá col arreglu de la cera que sirve de camín piatonal pa comunicar la cai de la Vega col barriu de la Ilesia” – concluyó'l conceyal.