L'Asociación Amigos del Horru Asturianu entama la I Xornada d'Estudiu del Horru Asturianu'l próximu sábadu, 29 de setiembre, na Casa de la Cultura de Candás.
Na presentación de la Xornada, que se celebró esti 25 de setiembre nel Salón Plenos de la Casa Consistorial participaron el Presidente de la Organización Víctor Suárez García acompañáu del diseñador gráficu de la imaxe y cartelería de la xornada, Goyo Rodríguez, sociu d'honor de l'Asociación. En representación del Conceyu intervinieron les conceyales, Paula Cuervo, Conceyala de Festexos, y Cecilia Tascón, Edil de Cultura.
L'Asociación del Horru Asturianu ye una organización de trabayu de persones comenenciudes en realizar un viaxe nel tiempu, al rescate d'un pasáu, que resistente al olvidu pervive por toa Asturies.
“Signu de la nuesa identidá asturiana, los horros, paneres y cabazos constitúin una manifestación xenuina del nuesu patrimoniu cultural. Son protagonistes vivos de la nuesa arquitectura popular. Almirables pola so estructura técnica constructiva en madera. Ayalgues sorprendentes pol so equilibriu y solidez ente toos les sos pieces, afiguráu artísticamente nos trés estilos decorativos esistentes, Villaviciosa, Ayande y Carreño” comentó Cecilia Tascón, Concejala Cultura-.
La Xornada va desenvolvese a lo llargo de too el día, dando empiezu a les 11:00 de la mañana y rematando en redol a les 19:00 hores. Nesta I Xornada d'Estudiu van allegar distintos profesionales asturianos:
· Jesús Antonio González Calle, Doctor n'Hestoria. L'añu pasáu foi l'encargáu d'abrir los III Alcuentros de l'Alfoz de Gauzón que se celebraron en Candás n'ochobre del 2017.
· Xanchu Obaya, Llicenciáu n'Hestoria. Ye autor de la tesis “ Los Oríxenes del Horru” y del llibru dedicáu a estes construcciones.
· Iván Muñiz López, Doctor n'Hestoria, arqueólogu y profesor de la UNED. Foi Premiu Estraordinariu Fin de Carrera. Ye unu de los más prestixosos especialistes asturianos en cultura material, Edá Media y Patrimoniu.
Tres la Conferencia d'esti postreru, va tener llugar a les 17:00 hores la Mesa Redonda na que va aldericar los problemes actuales d'estes estructures, los trés estilos esistentes (Villaviciosa, Ayande y Carreño).
L'Horru más antiguu del que se tien conocencia data del s. XV atopándose en Quirós, ente que nel casu de Carreño ye un horru del s. XVI pintáu n'estilu Villaviciosa alcontráu na parroquia de Perlora.
Albandi
