Esti fin de selmana, dende Candás,
partió, hasta Santiso d'Abres, la primer escursión de
senderismu tres el periodu branizu. Nel marcu del programa Caleyando
Carreño impúlsense estes actividaes senderistes gratuites que
dexen, a les persones mayores, averase al mediu ambiente, conocer el
patrimoniu cultural y, al empar, faer deporte.
Dende la área d'igualdá municipal
promuévese esta práctica deportiva enfocada a toes aquelles
persones que-yos guste caminar en cualquier dómina del añu.
L'oxetivu d'esta actividá ye que les persones mayores participantes
ocupen el so tiempu llibre con una actividá física, social y
lúdica, al empar que conocen los espacios naturales más singulares
de la rexón y practiquen el turismu rural y de naturaleza.
“Les actividaes de senderismu,
d'esti programa, favorecen l'avieyamientu activu lo que dexa
ameyorar la calidá del estilu de vida de les persones mayores,
prevenir o retrasar situaciones de discapacidá y dependencia y
reforzar la so participación social” – señaló
l'Alcaldesa.
Rubén Muñiz, ye'l guía especializáu
que programa cada percorríu. Diseña y estudia minuciosamente los
percorríos ufiertaos, acompaña al grupu nel desenvolvimientu de
l'actividá deportiva non competitiva y tresllada con antelación
toos los encamientos pa completar con ésitu los trayectos previstos.
Trátase de salíes d'intensidá baxa-media.
El próximu 6 d'Ochobre va
tener llugar la segunda ruta de Caleyando Carreño de la temporada, y
quinta d'anguaño, va tener llugar nel Conceyu de Ponga. La duración
de l'actividá física, esi día, va ser de 9 de la mañana
hasta les 19h. El puntu de recoyida y llegada del autobús va ser el
Teatru Prendes. Esta ruta va trescurrir dende Collada Llomena hasta
Collada Granceno p'acabar de nuevu en Collada Llomena, va ser un
percorríu d'unos 9 kms con una dificultá baxa.
Les places disponibles, van axudicase
por rigorosu orde d'inscripción, siendo esta gratuita. Les
inscripciones van poder realizase del 24 de Setiembre al 3
d'Ochobre na Casa d'Alcuentros de les Muyeres de Carreño,
n'horariu de mañanes de 9 a 14 h, y de tardes de 17 a 19
h.
Pa cualquier consulta, les persones
comenenciudes pueden ponese en contactu col Axente d'Igualdá na Casa
d'Alcuentros de les Muyeres de Carreño (Plaza Gremio de Mareantes 2,
baxu. Candás) Tlf.: 985872029 Email: igualdad@ayto-carreno.es
Albandi
