Prosiguen los trabayos de campu y estudiu de la manta candasina

Semeya familiar antigua con Ana Muñiz "La Macarra", vistiendo la manta Candasina
L'antropóloga ya historiadora, Fe Santoveña ta presente dos díes nel Edificiu Polivalente “La Baragaña” de Candás pa estudiar y analizar les mantes candasines más antigües que voluntariamente apurre'l vecinderu de Carreño

Nesti primer alcuentru d'esti 22 de setiembre, estudió les primeres cuatro mantes de principiu de sieglu. Daten ente 1900 y 1915, tán en bien bon estáu de caltenimientu, de manera, que bien podríen pasar por manta d'agora. Les propietaries amosáronles acompañando a les mesmes de semeyes inédites de les primeres propietaries con elles puestes colo que foi más fácil datales. 

“Estes mantes más antigües nun son tan grandes, en relación a les que se lleven agora. Dos de les estudiaes tienen el cuerpu, l'ente dos de rococó y la puntilla, más curtia en comparanza coles nueses, tamién de rococó. Paécense enforma”– esplicó Cecilia Tascón, Conceyala de Cultura.

“Mañana vamos tar de nuevu nel polivalente por si dalguna familia más nos dexa ver y analizar les suyes. Les que vimos güei son mantes de llana, perlé y sedón. Les dos son les más antigües, de la familia de Teresa a Calaca y de la familia d'Ana Muñiz, la Macarra”– prosiguió Tascón. 

 “A tal fin, Fe Santoveña va tar tamién esti 23 de setiembre, de 10:30 a 13 h. nel Centru Polivalente La Baragaña por que les persones que la deseyen puedan participar nel estudiu, apurriendo la so collaboración, por aciu l'analís de les pieces más antigües y pa la toma de semeyes. Y pa aquelles persones que tienen una manta, pero que nun puedan allegar a les cites d'estos díes, va atendese la collaboración dende la Conceyalía de Cultura, contactando directamente col Ayuntamientu”– señaló la Conceyala.