Iniciatives como'l bancu de llibros, les xornaes socioculturales para'l fin de cursu, actividaes extra escolares sobro patinaxe, kárate, baille, inglés , cocina, salíes sociu-culturales, etcétera son dalgunes de les actividaes subvencionaes y que a lo llargo del cursu escolar impulsen les Asociaciones de Padres y Madres del alumnáu qu'allega a los Centru Educativos del conceyu. A tal fin, añalmente la Conceyalía d'Educación, convoca esta llínea de subvenciones, en concurrencia competitiva, pa Entidaes venceyaes a la Educación o Centros Educativos que'l so oxetivu ye ayudar a les asociaciones d'alumnos/es y de padres y madres del alumnáu del conceyu, na realización d'actividaes, programes y eventos educativos. 

“L'artículu 18 del Estatutu d'Autonomía del Principáu establez que-y correspuende a la Comunidá Autónoma'l desenvolvimientu y execución de la enseñanza en tola so estensión, niveles y graos, modalidaes y especialidá. Col fin de promover la realización d'actividaes d'interés pa la comunidá educativa y consolidar la implicación y participación de les families nel procesu educativu como sofitu a esti procesu, el Conceyu de Carreño convoca estes ayudes municipales ” comentó Cecilia Tascón-Conceyala d'Educación.

“La implicación de les asociaciones de madres y padres y de l'alministración local na vida escolar, fomenta la necesaria xunión de les actuaciones formatives favorecíes nel ámbitu familiar, educativu y comuñal. Ye necesariu potenciar la implicación de tola comunidá educativa pal desenvolvimientu d'una educación pública calidable, convirtiendo a tola sociedá en coprotagonista y corresponsable de la educación” prosiguió Tascón.

“Son oxetu d'ayuda los gastos causaos pola realización de les actividaes de les asociaciones qu'escuerran ente otros dalgunos d'estos oxetivos: actividaes de promoción de la convivencia nos centros; les que faciliten la conciliación familiar; les que fomenten la inclusión educativa, la interculturalidá, la ocupación del tiempu llibre del alumnáu por aciu la cultura, deporte o l'ociu saludable; actividaes que complementen o sofiten les actividaes curriculares…” remató la edil.

Les Asociaciones del Conceyu qu'en concurrencia competitiva, optaron a estes subvenciones fueron cuatro entidaes. De les cuales toes cumplieron colos requisitos esixíos na convocatoria. Les entidaes y proyectos subvencionables n'anguaño 2018 son los siguientes:

• Asociación de Padres y Madres del Colexu Poeta Antón. Actividaes subvencionaes extra escolares: cursos de baille, inglés, cocina, axedrez, pre-fútbol, patinaxe y robótica; ye la encargada del programa “atención temprana” del colexu cola organización del serviciu d'almuerzu y guardería, amás de ser los responsables del serviciu de comedor escolar y tardes risonderes mientres los meses de xunu y setiembre; talleres pa padres y madres; xornada de convivencia de fin de cursu; escursiones culturales.

• Asociación de Padres y Madres del Colexu San Félix. Actividaes subvencionaes Talleres de Karate, bádminton, ballet, robótica, manualidades, patinaxe, zumba, espresión corporal,…; bancu de llibros; salíes sociu-culturales; collaboraciones con otres entidaes del Conceyu; xornada de fin de cursu.

• Asociación de Madres y Padres del IES. Actividaes subvencionaes: salida ciclu-turista, les orles de fin de cursu; concursu lliterariu, de micro-rellatos y de video; concursu fotografia; el fondu de llibros de la biblioteca IES, charres informatives y d'orientación a padres y madres.

• Asociación del alumnáu, madres y padres de la Escuela de Música Municipal “Miguel Barrosa”. Actividaes subvencionaes: alquisiciones d'instrumentos musicales pa la creación d'un bancu de los mesmos; alquisición de materiales didácticos y partitures pal so préstamu al alumnáu; participación y collaboración nes actividaes entamaes pola Escuela de Música: conciertos, audiciones, vídeos, representaciones.

Pa encarar el patrociniu d'estes actividaes nel Presupuestu en puxanza esiste una partida municipal que los sos fondos, en función de la puntuación llograda na convocatoria de subvenciones, distribuyéronse cómo siguen:

-El 29,47 % de los fondos municipales esistentes pa los proyectos presentaos por el AMPA del IES de Candás.

-el 28,82 % pa los proyectos presentaos del AMPA del Colexu San Félix de Candás.

-el 24,81 % a los proyectos del AMPA del colexu Poeta Antón de Mariarreguera de Candás.

-y el 16,90% del presupuestu disponible pa los proyectos del AMPA de la Escuela de Música Miguel Barrosa de Carreño.

El plazu de presentación de la xustificación de la subvención municipal concedida va rematar el 30 de noviembre del 2018. La documentación tendrá de presentase al traviés del Rexistru Electrónicu del Conceyu de Carreño o nos rexistros electrónicos de cualesquier de los suxetos a los que se refier el art. 2.1 de la Llei 39/2015 , de 1 d'ochobre, de Procedimientu y Alministrativu de les Alministraciones Públiques. Y la documentación presentada tendrá d'incluyir Memoria Técnica y Xustificativa, amás de los orixinales de les factures cuando la subvención sía mayor de 3.000€; nel casu de nun superar esa cantidá nun va ser necesariu presentar los orixinales, va sirvir una copia.