El Conceyu de Carreño, al traviés de
la Conceyalía de Deportes, convoca añalmente Beques a
Deportistes Individuales Non Profesionales, en concurrencia
competitiva. Entendiendo por Deportistes Individuales Non
Profesionales a aquelles persones que nun reciben retribuciones
económiques pola so actividá y que destacaren a nivel individual o
integraos/es n'equipos, pola so participación y ésitos deportivos
en competiciones oficiales, autonómiques, nacionales o
internacionales.
Les ayudes o beques van consistir
n'una aportación para collaborar a financiar los gastos que xenera
l'actividá y práctica deportiva de les persones beneficiaries. van
concedese a aquellos as deportistes que realizaren la so
actividá deportiva nel períodu entendíu ente'l 1 d'ochobre de 2017
y el 30 de setiembre de 2018.
“Añu tres d'añu siguimos
calteniendo esti tipu d'ayudes individuales, de les cuales, casi
150 carreñenses, pertenecientes a les disciplines, ente otres,
de yudu, atletismu, piragüismu, a lo llargo d'estos 10 años
pudieron beneficiase. Estes Beques xuntu coles Subvenciones a les
entidaes deportives, dexen de manifiestu nuesu roble compromisu col
deporte en Carreño. Ensin escaecenos de tol llabor que, dende les
instituciones públiques, vien realizando'l Patronatu Deportivu
Municipal”– comentó Roberto Bueno, Conceyal de Deportes.
“El Deporte ye un patrimoniu
al que tien derechu tola población, entendiendo que la ufierta
deportiva municipal tien de algamar a tolos grupos d'edá y sectores
sociales, evitando na midida de lo posible que nenguna persona o
colectivu quede al marxe del fenómenu del deporte. Con esta
premisa vien entamándose en cada temporada deportiva el programa
“escueles deportives”, “guardería deportiva” o'l deporte de
tiempu llibre nel que s'encuadren por casu l'actividá física
pa mayores de @60 años o ximnasia de caltenimientu, de
musculación, pilates,…” señaló Bueno.
Van Poder beneficiase d'estes beques
deportistes que realizaren la so actividá nel períodu enantes
referíu y qu'axunten ente otros les siguientes condiciones:
• Ser deportista non
profesional.
• Tar federáu/a mientres la
temporada 2018-2019, en dalguna federación del Principáu d'Asturies
y/o delegación de la federación nacional.
• Tar encuadráu/a en dalguna de
les categoríes siguientes: cadetes, xuveniles, junior, promeses
y senior, entendiendo esta postrera como criterios absolutos.
• Tar censáu/a nel Conceyu de
Carreño, con una antigüedá mínima de 2 años a la fecha de la
convocatoria d'estes ayudes.
• Nun tar asalariáu/a.
El plazu pa presentar la solicitúes va
ser de 20 díes a partir del día siguiente de la publicación
de la Convocatoria d'estes Beques a Deportistes Non Profesionales nel
Boletín Oficial del Principáu d'Asturies. Les solicitúes van
presentase en modelu oficial xuntu cola documentación esixida y
aquella qu'acredite los llogros consiguíos nes feches oxeto d'esta
convocatoria. Podrán presentase nel Rexistru Xeneral del Conceyu de
Carreño (c/ Santolaya 1-3, Candás), o en
cualesquier de los procedimientos establecíos nel art. 16 de la Llei
39/2015, de 1 d'ochobre, de Procedimientu Alministrativu Común de
les Alministraciones Públiques., nel siguiente horariu:
- llunes, miércoles, xueves y
vienres de 9:00 a 14:00 hores.
- martes de 9:00 a 18:30 hores.
Pa más información consultar la
páxina web www.ayto-carreno.es o nos teléfonos
985-870205/06.