L'Arquivu Históricu Municipal foi l'escenariu escoyíu por que la restauradora, contratada pol Conceyu de Carreño, apurriera los cuatro documentos del s XIX que s'escoyeren para restaurar y caltener nesta añalidá.

La restauración de los mesmos facilita que puedan consultase estos importantes documentos para percanciar más datos sobre la hestoria del conceyu. Cada unu riquió d'intervenciones distintes dependiendo de la fase de deterioru na que s'atopaba con oxetu de garantizar la so consulta y caltenimientu futuru. Los oxetivos fundamentales de la intervención nestes obres fueron frenar los efectos de les alteraciones y los deterioros sufiertos col pasu del tiempu: llagunes de soporte, deformaciones, alteraciones de color, ataque biolóxicu y perda de consistencia xeneral por cuenta de l'acidez.

Nel marcu del presupuestu municipal vixente, l'archivera municipal Mª del Carmen Cantero, afitó como prioridá técnica los trabayos sobre esta documentación del conceyu. Tres el correspondiente pidimientu de presupuestos a trés empreses de reconocíu prestíu, axudicáronse los trabayos de restauración y caltenimientu de los cuatros documentos a la restauradora avilesina, María Blanco de la Piñera, por un importe de 2.995,83 €. 

Fueron 4 los documentos del s XIX a  los que se dio en anovar el so estáu, siendo los  siguientes:

De 1852 el Catastru del Marqués del Ancón Índiz de los Bienes y del vecinderu del conceyu.  Ye l'Espediente 3 de la Caxa 608. 

De 1813-1840 el Repartimientu y Memoriales Cobradores de les contribuciones estraordinaries de guerra nos años 1813, 1838, 1839 y 1840. Ye l'Espediente 2 de la Caxa 618.

De 1832-1840 el Repartimientu de la contribución d'Instrumentos d'esos años. Espediente 3 de la caxa 618.

De 1839-1840 l'Estáu de les Contribuciones Ordinaries en cada parroquia del Conceyu de Carreño y memoriales cobradores por cuenta de les contribuciones de Frutos Civiles, Instrumentos, Gastos Comunes, Hospiciu, Déficit d'Encabezadura y otres d'esos años. Espediente 4 de la caxa 618.

“El Catastru del Marqués del Ancón xuntu colos documentos que se dio na so restauración y caltenimientu, y qu'obren nel Arquivu Históricu Municipal, constitúin una de les fontes básiques d'información sobre'l Conceyu de Carreño nel s. XVIII. A partir d'esa documentación, puede estudiase la hestoria del conceyu dende un puntu de vista económicu yá que nellos quedó reflexáu los bienes, propiedaes, impuestos, contribuciones a les arques municipal y estatal, yá sía individualmente, por parroquies o polo xeneral, per parte de la ciudadanía. Pero tamién ye una fonte d'estudiu dende'l puntu de vista social, xeográficu,… al apaecer reflexáu con nome y apellíos  los o los titulares de les propiedaes, les sos conyugues, les sos dimensiones, localización, persones que les habitaben, los posibles herederos o herederes, les persones que trabayaben nesos bienes,… “ señaló Cecilia Tascón- Conceyala de Cultura.

La Restauradora avilesina foi la encargada de realizar nos documentos les siguientes operaciones:

1. Desinfección de los Documentos  al traviés del sistema anóxicu. Esti métodu consiste en crear una atmósfera con un porcentaxe ínfimu d'osíxenu, controlando'l mugor y la temperatura, col fin d'esaniciar les poblaciones d'insectos y detener el desenvolvimientu de microorganismos.

2. Estudiu Inicial que va consistir en tomar datos y rexistru fotográficu dixital de les obres antes de la intervención, detallando los daños que presenta, les característiques, los materiales.

3. Foliación de seguridá de tolos bifolios previu al so desmontaje, según un estudiu de la estructura de los cuaderninos. Esta xera va dexar constancia del sistema de cosíu.

4. Desmontaxe de los espedientes.

5. Estudiu Científicu-Técnicu, esto ye, van faese pruebes de pH pa ver el grau d'acidez del soporte; analís de papel y de les tintes; pruebes de abrasión y de solubilidá de les tintes….

6. Llimpieza Mecánica que va dexar la eliminación del polvu y suciedá polo xeneral.

7. Llimpieza Aguacienta. Con esta llimpieza pretende llograse la disolución y estracción de los productos de degradación solubles que contribúin a la acidificación y el mariellamientu del papel.

8. Desacidificación y Ensugáu Oreo. Pa menguar el grau d'acidez del papel van desacidificase les llámines.

9. Llaminación con un refuerzu naquellos que presenten una mayor fraxilidá.

10. Reaprestu col afitamientu del soporte pa faer posible una manipulación segura.

11. Reintegración de les Perdes de Soporte. Va dase nel so arreglu y refuerzu.

12. Allisáu col fin de recuperar la so forma orixinal ensin variaciones de dimensión.

13. Reencuadernación respetando les pasaes orixinales del documentu.

14. Montaxe de Caltenimientu, tres la intervención realizaráse una carpeta de caltenimientu que dexe la consulta del llibru ensin tener que abasnar dexando una meyor caltenimientu.

“Los documentos restauraos qu'apurrimos al consistoriu carreñense caracterícense por disponer d'un papel, de procedencia alemana, d'una bien alta calidá, lo que supunxo recuperalos a un estáu aceptable. Son verdaderes xoyes de la nuesa hestoria. Al traviés d'ellos, de la calidá del papel, de les tintes utilizaes, del tipu de lletra, del cosíu, … podemos analizar les distintes etapes de la nuesa sociedá, de les sos meyores, modes,… son verdaderes amueses del nuesu pasáu” –señaló María Blanco-restauradora-.