Trelce aspirantes a la Beca Antón

El próximu miércoles, 14 de noviembre, va tener llugar nel Salón de Plenos del Consistoriu de Carreño la xunta del Xuráu de la Beca Antón d'Ayuda a la Creación ya Investigación Escultórica, encargada de conceder la 26ª Beca Antón, patrocinada pola Fundación EDP.

El Xuráu ta constituyíu poles siguiente persones: Amelia Fernández López, presidenta del Patronatu Muséu Antón; Ángel Moraleda, representante de la Fundación EDP; Natalia Tielve García, profesora d'Hestoria del Arte de la Universidá d'Uviéu; Luis Feás, Críticu d'Arte, Lydia Santamarina, Directora del Muséu Barjola; Armando Rodríguez, xestor cultural; Daniel Franco, artista; Luis Gorrionero, pintor y enmarcador; Cristina Acuña, profesora d'arte del IES de L.luarca y Dolores Villameriel, Directora del Muséu Antón.

Les candidatures qu'opten a la Beca Antón son trelce, procedentes de diverses ciudaes españoles.

L'oxetu de la Beca ye financiar la ellaboración d'un proyectu espositivu d'escultura, en cualesquier de les sos aguaes y formatos, llinguaxes, soportes conceutos, pa realizar nes sales d'esposiciones temporales del Muséu Antón de Candás.

La cuantía de la mesma ye de 6.000 € y alla pudieron optar artistes o grupos artísticos españoles o residentes n'España, ensin llinde d'edá.

Nos postreros cinco años la Beca foi concedida a artistes de diversa procedencia:
Stella Rahola (Barcelona, 1980), Beca 2013, pol so proyectu “Papel”; Belén Rodríguez  (Valladolid, 1981), Beca 2014, pol so proyectu “Plástica”; Lucas Martínez (Valencia, 1987), Beca 2015, pol so proyectu, ”Tránsitos oceánicos” y María Castellanos (Xixón, 1985) y Alberto Valverde (Madrid, 1967), Beca 2016. pol so proyectu Ensayo y error del posthumano, Esther Pizarro (Madrid, 1964), Beca 2017 , pol so proyectu “Mapping Active Fire Data:: [MAFD]”.

La Beca empezó a convocase nel añu 1990 col enfotu de sofitar, aguiyar y fomentar les actividaes creatives redolada a la escultura. La mesma inspírase en cierta midida na mesma biografía del escultor Antón que recibió, por cuenta de lrs so innates dotes pal arte y a la so capacidá de trabayu, l'ayuda desinteresada de delles persones de la so villa natal, lo que-y dexó desenvolver la so trayectoria artística.
Dende l'añu 1998 cuenta col patrociniu de la Fundación EDP.