El gobiernu de Carreño va presentar na próxima comisión de
Facienda'l Plan d'Amenorgamientu de la Contratación Menor. Nel marcu
que supon la nueva llei estatal de contratos del sector públicu, el
Conceyu de Carreño afondó na ellaboración d'un plan
d'amenorgamientu de la contratación menor “ coles mires
d'optimizar la xestión y por que el sistema sía funcional, eficaz,
eficiente y tresparente.”, señaló Paula Cuervo, vocera del
gobiernu local.
“Vamos Avanzar nesti oxetivu al traviés de la planificación
prevista nel plan y el diseñu d'un sistema automatizáu, que dexe la
tramitación y siguimientu pormenorizáu de tolos gastos menores. van
incorporase al sistema toos departamentos o secciones, que precisen
realizar un gastu, esto ye: Patronatos, Xulgáu, Biblioteca, etc. Y
por que el sistema funcione correctamente va ellaborase y va
aprobarse una Instrucción interna de contratación menor d'obligáu
cumplimientu”, esplicó Paula Cuervo.
“El restu de grupos municipales van poder treslladar les sos
aportaciones y va dase cuenta a la Comisión Informativa de Facienda
del desenvolvimientu de la so evolución, según cada añu d'un
informe d'evaluación que se va someter a la so valoración”,
añedió la vocera.
Esti Plan va ser aprobáu pola Alcaldía previu informe de la
Comisión de Facienda y va tener calter dinámicu, de manera que
puedan incorporase acciones y midíes dando cuenta a la Comisión de
Facienda. El plan va entrar a valir el día de la so aprobación y va
ser publicáu nel Portal de Tresparencia Municipal.
Albandi
