Carreño nel Mundu de la Música col Maestru García Asensio

La Escuela Municipal de Música “Miguel Barrosa” de Candás impulsa, pa esta fin de selmana, una serie d'actividaes musicales que'l so protagonista va ser la batuta que dirixe'l Maestru Enrique García Asensio.

Enrique García Asensio (1937), ye un director d'orquesta español  que se fixo bien popular cola so intervención, ente 1976 y 1980, nel programa de TVE El Mundu de la Música. Foi'l director titular de la Orquesta Sinfónica RTVE mientres 26 años, de 1966 a 1984 y de 1990 a 1998. Dirixió casi toles orquestes españoles y la so actividá nel campu internacional desenvolvióse nos cinco continentes.

En 1970, convirtióse nel primer Catedráticu de Dirección d'Orquesta del Real Conservatorio Cimeru de Música de Madrid. Dio cursos de Dirección en toa España y nel estranxeru. Tien una estensa discografía grabada n'España ya Inglaterra. Na actualidá compaxina la dirección d'orquesta cola actividá de conferenciante y la impartición de clases maxistrales de dirección d'orquesta.

Ta en posesión de premios y distinciones otorgaes pola RAI de Milán (1962); Rotary Club de Siena, Academia Chigiana (1963); Primer Premiu Dimitri Mitropoulos de Nueva York (1967);  Academia Charles Cros de Paris (1976) y Premiu d'Interpretación Discográfica 1991 del Ministeriu de Cultura, ente otros.

En 2012, la Fundación Celibidache, con motivu del Festival Celibidache 100, celebráu en Bucarest nel centenariu de la nacencia del famosu director rumanu, escoyó a Enrique García Asensio pa impartir les Clases Maxistrales de Dirección.

El plenu del Conceyu de Valencia nomólu, por unanimidá, “Fíu Predilectu” de la Ciudá (2012).

Dende'l consistoriu, en  collaboración cola Escuela Municipal de Música “Miguel Barrosa” , pretendemos dar la oportunidá de qu'esfrutar d'unes xornaes nes que compaxinar la teoría cola práctica musical tantu l'alumnáu de la nuesa  escuela, según persones d'otres localidaes d'Asturies que tengan moliciones musicales. Un espaciu nel que, non solo, l'alumnáu y  personal docente de la Escuela va poder esfrutar y aprender, poniendo en práctica los conseyos recibíos por unu de los meyores directores d'orquesta españoles, sinón que tamién, toes aquelles persones aficionaes a la música van tener una oportunidá única na que van conocer de primeres los rellabicos qu'arrodia a una gran orquesta, cual ye'l llabor de la figura del director, como ye un ensayu,… amás de poder dar respuesta a les sos moliciones, yá que tolos actos son abiertos y gratuitos pa la ciudadanía hasta completar l'aforu de la sala”– comentó Cecilia Tascón, Conceyala d'Educación y Cultura.

Les xornaes col Maestru Enrique García Asensio, van llevase a cabu en dos díes y van  tener llugar nel Salón d'Actos del Edificiu Polivalente “La Baragaña” de Candás esti vienres 30 de noviembre y el sábadu 1 d'avientu, siendo abiertes y gratuites pa tol públicu asistente:

·Vienres 30 de noviembre a les 20:00 h. Presentación del llibro “Dirección Musical”. Va Ser un actu dinámicu nel que sol formatu d'una charra/coloquiu'l Maestru va falar sobre'l so llibru y la so trayectoria musical, lo mesmo que de la so visión de la educación musical. L'oxetivu d'esta charra ye averar al públicu la figura del director d'orquesta, faer que los y l'aficionaes a la música entiendan y conozan la so misión.

·Sábadu 1 d'avientu a les 19:00 h. Master Class y Ensayu Públicu de la Banda Sinfónica Infantil y Xuvenil del Principáu d'Asturies con dirección del Maestru García Asensio. Ye una sesión abierta a tol públicu nel que los y les componentes de la Banda van materializar y exemplificar la esposición teórica realizada'l día anterior.