A partir de mañana, nel marcu del plan de renovación de plaques viaries en Candás va realizase l'allugamientu de 8 nueves plaques, ente elles, la relativa a la Plaza de la Baragaña. La cuál va llevar na placa con una recreación cerámica de la fachada del Teatru Marina. Teatru que foi escenariu de cine mudu, viéndose la so actividá tarazada pola guerra civil, anque darréu retomóla hasta 1949, cuando énte les meyores condiciones de la sala Apolo la familia Prendes optó pol zarru del Marina.

Al entamu d'esta llexislatura impulsóse un Plan de Renovación de les Plaques indicatives de les cais de Candás, el cuál empezó a executase nel añu 2016. Un Plan que'l so oxetivu foi homogeneizar y personalizar toles plaques indicatives de la villa, sustituyendo progresivamente les esistentes por unes artesanales con motivos propios de cada zona que-y dan una identidá propia a la villa capital del conceyu.

“Candás tien una hestoria de cine, gracies a el so importante heriedu y tamién a la so supervivencia esta hestoria tamién va quedar afigurada nel callajero. Y ye que Candás tien na actualidá l'únicu cine de contornes abiertu n'Asturies. Equí llegáronse a allugar hasta cinco sales d'espectáculos y proyecciones dende l'apaición del teatru Santarúa, en 1903, hasta'l teatru Prendes, que pervive na actualidá” explicóOnésimo Velasco, conceyal d'Obres.

“Dellos yeren  los materiales, modelos y colores de les plaques esistentes nel caleyeru candasín. Amás dimos cuenta qu'en determinaes cais por cuenta de les inclemencies y al pasu del tiempu yera necesaria la so renovación. Polo que se punxo en marcha esti Plan de Renovación, coles mires de camudar les plaques por un modelu común a tola villa y propiu, fechu colos mesmos materiales, colores y tamaños” prosiguió'l conceyal.

“Siguiendo'l llabor empecipiáu a partir de mañana miércoles otres 8 cais y places de Candás van ver sustituyíes les sos plaques poles creaes de forma artesanal pola ceramista local Rita Prendes. Nesta fase'l serviciu d'obres va acometer les citaes sustituciones nes cais Arquitecto Reguera, Ángel Rendueles, Ramón y Cajal, Venancio Álvarez Buylla, Rúa, Gabiana, Carretera del Faro y Plaza de la Baragaña” añedió el Conceyal.

“Toes estes nueves lleendes lleven un motivu rellacionáu cola mesma cai o cola zona próxima a la mesma dando con ello un aire personalizáu. D'esta forma na plaza de la Baragaña vamos ver al antiguu Teatru Marina o na cai Ramón y Cajal la Farola, pasando pol motivu d'unes barques pa la cai Ángel Rendueles”  afirmó Velasco.

“Estes nueves 8 plaques, sumaes a les anovaes n'años anteriores suponen un total de 20 paneles camudaos. El nuesu propósitu p'años futuros en siguir avanzáu nesti sentíu hasta completar la totalidá del caleyeru de Candás”  concluyó'l conceyal d'obres.

Toles plaques tán realizaes de manera artesanal, pola ceramista local, Rita Prendes y ellabórense una a una, polo que nun hai una igual, son pieces úniques. Tán feches en material refractariu, cocíu a 1.250 graos p'asegurar la so llonxevidá.