El próximu llunes 26 de noviembre va dar empiezu una nueva edición del Programa d'ociu pa los neños y les neñes “Ludómovil Rural” pal cursu escolar 2018-2019.
“La Ludomóvil ye un proyectu, gratuitu empuestu a la dinamización de la zona rural averando a los neños y neñes una serie de recursos, evitando asina'l desplazamientu. Poniendo al so algame unos materiales xuntu cola intervención de monitores, espertos/es n'educación nel tiempu llibre. Ye un programa impulsáu y financiáu pola Conceyalía que presido en collaboración cola Oficina d'Información Xuvenil perteneciente a la Mancomunidá Cabo Peñes, que ye la encargada de la so organización” señaló Roberto Bueno-Conceyal de Mocedá.
“Van Ser más de 120 hores de diversión, rises y tamién d'aprendizaxe d'una forma lúdica, xugando, partíos ente los 81 díes nos que se desenvuelve esti Programa d'Ociu nes parroquies de Carreño, mientres los meses de noviembre a mayu. Les actividaes tán dirixíes a neños y neñes de 3-12 años, nes que procuramos la implicación de les families nel proyectu ya, inclusive, la dinamización de toda la redolada” comentó'l conceyal.
Cuatro van ser los escenarios nos que se van desenvolver estos talleres d'una hora y media de duración acaldía, nel siguiente horariu:
•Centru d'Iniciativa Rural de Albandi, va tener llugar los llunes a partir del 26 de noviembre mientres el períodu lectivu escolar de 17:00 a 18:30 hores.
• Xibares, Local social Urbanización “Sablera de Xivares”, va ser tolos xueves a partir del 29 de noviembre mientres el períodu lectivu escolar de 18:00 a 19:30 hores.
•Escuela de Quimarán-El Valle, tolos miércoles dende'l 28 de noviembre mientres el períodu lectivu escolar de 17:00 a 18:30 hores.
•Escuela de Llorgozana, tolos vienres dende'l 29 de noviembre mientres el períodu lectivu escolar de 12:15 a 13:45 hores.
“L'Asociación Cultural “Súbete” va ser la encargada de la coordinación y desenvolvimientu de les actividaes, de talleres, dinámiques, gymkhanes, y xuegos, que van tratar sobre materies bien distintes y variaes. Que van dir dende "Conocemos”, “Derechos de la Infancia”, “Que vien el Faroleru”, “Sobro ruedes”, “Lleer xúbesete a la cabeza”, “La paz” hasta “Asturiana”, “Tenemos enforma que ver” o “El monte encantáu”” remató Bueno.
Aquelles persones que tean interesaes en participar nesta actividá, tendrán d'efectuar la inscripción correspondiente, de forma gratuita, ente'l llunes 19 al vienres 23 de noviembre, dambos inclusive. Esta inscripción va poder faese de trés formes:
•Presencial. Allegando a la Oficina Joven Cabo Peñes allugada nel Edificiu Polivalente “La Baragaña” en Candás los llunes y vienres de 9:00 a 14:00h y miércoles de 9:00 a 14:00 hores y de 16.00 a 17:00 hores.
•On-line. Unviando corréu electrónicu a oij@mcabop.com
•Nes Escueles Rurales de Llorgozana y Quimarán-El Valle.
Pa más información puede consultase la páxina web municipal www.ayto-carreno.es/evento, onde tán disponibles pa la so descarga les distintes fiches d'inscripciones y tola información relativa a los horarios, llugares y horarios de impartición del programa “Ludomóvil Rural”
Albandi
