Estos díes, na parroquia de LLorgozona empezó la primera de les cuatro actuaciones encuadraes nel Proyectu Ameyora de la Rede de Suministru d'Agua del Conceyu que va efectuar la Conseyería d'Infraestructures, Ordenación del Territoriu y Mediu Ambiente del Principáu d'Asturies en Carreño.
“Dalgunos de los tramos de la nuesa rede de suministru d'agua presentaben una serie de defectos nes conducciones del so tresporte, lo que daba llugar a un eleváu númberu de frayatos y fugues. Con estes meyores na rede solucionaránse les posibles defectos y va garantizase el correctu suministru d'agua potable. Van Ser anovaos una serie de tramos, aprosimao 4.000 metros de tubería pa suministru d'agua, según les sos correspondientes arquetes” señaló Manuel Noceda, Conceyal del Mediu Rural.
“Les obres proxectaes de renovación y meyora de la rede, son cuatro actuaciones nes parroquies de Perlora, Llorgozana, Quimarán y Candás. Éstes pasen mayoritariamente per caminos municipales, anque tamién va ser necesariu pasar por ventiún propiedaes privaes, pa lo que yá se tienen los permisos pertinentes. Les meyores na rede de suministru d'agua van dar serviciu a más de cincuenta viviendes más les posibles futures” rellató'l conceyal.
Los cuatros actuaciones son:
• Actuación nº1: Renovación tramu bypass La Parada-Candás.
Renovación de 185 metros de tubería de fundición dúctil de 200 mm de diámetru, hasta llegar al marxe de la carretera AS-110 Tabaza-Candás, onde se va realizar una perforación horizontal so la mesma, de 20 metros de llargor.
Una vegada cruciada la carretera As-110, el trazáu de la tubería va siguir pola parcela hasta llegar al camín esistente y va siguir pol mesmu hasta llegar a les viviendes del barriu de la Teyera, con un total de 495 metros, que dende l'encruz de la carreta realizaráse con una tubería de polietilenu de 75 mm de diámetru.
Amás nesta actuación hai otru tramu de 190 metros de llargor, qu'escurre pel camín esistente, pasa so la carretera AS-118 Veriña-Lluanco per mediu d'un pasu inferior esistente y llega a Candás, nes proximidaes de la llínea ferroviaria de FEVE Xixón-Cuideiru, onde se conecta cola rede esistente, por aciu una arqueta con una válvula de compuerta.
• Actuación nº 2: Completar rede y conexones nel barriu de Cabovilla en LLorgozana.
Renovación de 620 metros de tubería de PVC empobináu de 160 mm de diámetru. Pártese d'una tubería esistente de polietilenu de 110 mm de diámetru y traviésense delles parceles, hasta llegar al camín esistente onde se va construyir una arqueta con válvula de compuerta y conexón a la tubería que va al depósitu.
Escontra la metá del trazáu del tramu anterior, va construyise un pequenu ramal, por aciu 140 metros de tubería de polietilenu de 75 mm de diámetru, hasta llegar a les proximidaes de la carretera AS-19 Xixón-Avilés, onde se va conectar cola rede esistente por aciu una arqueta con una válvula de compuerta.
A lo último, va anovase el trazáu pel camín esistente na zona de Cabovilla, por aciu 225 metros de tubería de polietilenu de 50 mm de diámetru, hasta l'encruz del camín cola carretera AS-19, pa dar serviciu d'agua potable a toles viviendes allugaes nes marxes del camín.
• Actuación nº 3: Completar rede y conexones nel Barriu El Fondo en Quimarán.
Renovación de la gran mayoría de la rede de distribución d'agua nel barriu d'El Fondo, en Quimarán al presentar ésta múltiples frayatos y fugues, lo qu'obliga a la renovación d'una serie de tramos pa garantizar el correctu suministru.
L'empiezu de la renovación realizase nes proximidaes de la Ilesia de San Esteban, onde se parte de la rede esistente y realízase una renovación de 255 metros de tubería de polietileno de 90 mm de diámetru, que va escurrir pel camín esistente, hasta llegar a la marxe de la carretera CE-6 d'Ambás, onde se va construyir una arqueta con cuatro válvules de compuerta.
L'encruz de la carretera yá ta realizáu, polo qu'una vegada al otru llau, el trazáu va siguir pel camín esistente por aciu 445 metros de tubería de polietilenu de 75 mm de diámetru hasta llegar a la parte de la Capiya de Los Remedios, onde se va construyir una arqueta con una válvula de compuerta.
El siguiente tramu, escurre tamién pelos caminos esistentes, consiste na renovación de 420 metros de tubería de polietilenu de 75 mm de diámetru hasta llegar de nuevu a la marxe de la carretera Ce-6 d'Ambás, onde se proyecta una arqueta con válvula y conexón a la rede esistente na zona.
A lo último, nesta actuación, va anovase'l trazáu pelos caminos esistentes nel barriu d'El Fondo, por aciu 345 metros de tubería de polietilenu de 75 mm de diámetru y 130 metros de tubería de 63mm de diámetru, pa completar la renovación de tola zona asitiada al sur de la carretera CE-6 d'Ambás y ameyorar el serviciu d'agua potable a toles viviendes allugaes na zona.
• Actuación nº 4: Completar rede y conexones n'El Regueral
Esta actuación consiste n'aprovechar la tubería esistente de polietileno de 63mm de diámetru construyida cuando se llevaron a cabu les obres de meyora del saneamientu y paralela al colector, que'l so trazáu atópase ente les viviendes y el regueru n'El Regueral.
Asina mesmu, antes de poner en serviciu la tubería de suministru d'agua esistente na zona, tendrán de realizase les correspondientes pruebes de presión y estanqueidá de la mesma pa comprobar el so correctu funcionamientu.
Nel entamu de l'actuación proxéctase la construcción d'una arqueta con válvula de corte, y darréu, na parcela de cada vivienda prevese realizar les conexones necesaries pa la renovación de les conducciones de les acometíes d'agua por aciu tuberíes de polietileno de 25 mm de diámetru y la construcción de nueves arquetes d'acometida.
“Les obres que van tener una duración máxima de 20 meses, dende la firma de l'acta de replantego, y suponen un costu total de 183.920€. Siendo la empresa encargada de les mesmes Contrates Souto, S.L.” remató'l conceyal.
Albandi
