Esti sábadu, 15 d'avientu, va tener llugar nel edificiu Polivalente “La Baragaña” de Candás la primera de les actividaes infantiles encuadraes dientro del programa local  “Desenvolvimientu sostenible, consumu responsable en Navidá”.  Estes actividaes entamaes pola Conceyalía de Bienestar Social tienen la collaboración Federación Asturiana de Conceyos al traviés del so programa de sensibilización que se van desenvolver esti mes d'avientu.

“El desenvolvimientu sostenible ye'l desenvolvimientu capaz de satisfaer les necesidaes del presente ensin comprometer la capacidá de les futures xeneraciones para satisfaer les sos propies necesidaes. Lo cual esixe un esfuerzu alcordáu para construyir un futuru inclusivu, sostenible para les  persones y el planeta. Llograr la consecución d'esti desenvolvimientu trai una implicación a nivel social, cultural y económicu ente otru que'l so últimu oxetivu ye erradicar la probeza, protexer el planeta y asegurar la prosperidá pa toos  y toes” comentó Paula Cuervo, Conceyala de Bienestar Social.

“La Navidá ye un tiempu de celebración, que lleva cultural y socialmente asociaos, ciertos vezos, que son contrarios a lo qu'implica un desenvolvimientu sostenible, pero esos vezos al traviés por casu de la educación pueden ser modificaos. La educación ye una de les pilastres básiques pa consiguir concenciar de la necesidá d'un desenvolvimientu sostenible, y ye por ello que ye necesariu que toles actividaes enfocaes a educar tengan como fin consiguir cumplir los 17 oxetivos  globales del desenvolvimientu sostenible” señaló la edil.

“Por tantu'l fin d'estos talleres ye espublizar el mensaxe de consumu responsable y de navidaes responsables, dando a conocer los oxetivos que los países marcáronse y faer cavilgar a los neños y neñes participantes que  tenemos parte nel cambéu, yá que consumir de manera responsable, inclúi ente otres munches coses por casu: non desperdiciar alimentos nes nueses cases, yá que repercute tantu nos bagazos que vaigamos xenerar, y qu'hai que reciclar o esaniciar, y que comer alimentos procesaos gasta más enerxía na so ellaboración y envasado del beneficiu que nun va xenerar el so ingesta, y nestes feches de navidá ye bien habitual; otra manera de consumir de forma responsable ye reutilizar coses que yá non nos sirven, pero que pueden tener otros usos, como pue ser en Navidá faer los adornos en cuenta de mercalos” prosiguió Cuervo.

“En cada unu de los talleres esplicarán los 17 oxetivos del desenvolvimientu sostenible (ODS), al traviés d'una metodoloxía lúdica, y va introducise el conceutu de reutilización. Los y les participantes van familiarizase col desenvolvimientu sostenible, van cavilgar sobre'l consumu responsable en navidá y van realizar adornos de navidá sostenibles” rellató la conceyala.

“Los adornos y faroles, que van realizar con material recicláu, van ser distintos en caúna de les sesiones, por qu'asina si dalgún neñu o neña allega los dos díes nun repita adornu. Estos adornos fechos con material recicláu van ser los adornos que decoren l'árbol navidiegu marineru que s'atopa na cai Valdés Pumarino. Estos asitiaránse tres la finalización del segundu taller el sábadu 22 d'avientu a les 13:00 hores” mentó Cuervo.

Los dos talleres infantiles de desenvolvimientu sostenible que se van realizar en Candás, van ser los sábados 15 y 22 d'avientu, nel Edificiu Polivalente “La Baragaña” nel horariu de 11:30 a 13:00 hores. Son dos actividaes gratuites, abiertos polo xeneral a la población infantil. Aquelles persones que tean interesaes en participar tendrán d'inscribise hasta'l vienres 14 na Conserxería del mesmu centru onde van tener llugar.

“El desenvolvimientu sostenible, trai una implicación a nivel social, cultural y económicu de toos y toes por que ente otres coses síamos capaces xuntos de llograr los 17 oxetivos de desenvolvimientu sostenible adoptaos por tolos países del mundu” - remató Paula Cuervo.