Esti vienres, 18 de xineru, na Casa d'Alcuentros de les Muyeres de Carreño empieza una esperiencia participativa con chisgo a la Ciencia dientro del Programa “Cultura, Xéneru y cómo inflúi nel nuesu Bienestar”, enfocáu a muyeres del conceyu de Carreño, nesti casu concretu les destinatarias van ser la Vocalía de Muyeres con Tiempu Propiu de Carreño, que preside Mariví Alonso y engloba a un colectivu mayor de 50 años.

Nel mesmu, les asistentes de la mano de la Química Ana María Fernández Cueto (Científica Quími) y coincidiendo col Día Internacional de la Muyer y la Neña na Ciencia - van averar na primer parte, a l'aportación de muyeres con vocación relixosa, demostrando que Ciencia y Relixón caminen xuntes, ensin escluyise, poniendo alma a la ciencia, afayando y poniendo en valor,  cuantimás, a la figura de Miriam Stimson la dominica del ADN.

Mientres la segunda parte, les muyeres van activar la mente formando “Palabres” utilizando los Elementos Químicos impresos en 3D - conmemorando l'Añu Internacional de la Tabla Periódica de los Elementos Químicos, y van potenciar la so creatividá pintando con Antocianina, mientres se rellacionen coles otres participantes na esperiencia científica. El taller va concluyir el 8 de Marzu.