L'Ayuntamientu de Carreño, aprobó destinar 112.012,17€ del remanente p'ameyorar les instalaciones deportives del Patronatu Municipal. Con ello, dase respuesta a una de los pidimientos formulaos pol vecinderu nel últimu procesu de presupuestos participativos.
Na redolada del patronatu deportivu esisten, inutilizables pa la práctica deportiva, dos pistes, que debíu al deterioru que presenten, la so obsolescencia y non adecuación funcional. El so estáu nun dexaba la práctica normalizada de deporte. La reforma qu'agora se plantega consiste na implantación d'una nueva pista de tenis reglamentaria y la reurbanización del ámbitu pa favorecer una futura instalación de dos pistes de pádel cubiertes
Proxéctase, amás de la implantación y equipamientu completu de una nueva pista de tenis reglamentaria al campu con llume artificial, la obra civil, rede de saneamientu ya instalación eléctrica necesaries pa una implantación inmediata d'una pista de pádel cubierta, susceptible de ser doblada fácilmente.
Tres la recién aprobación plenaria'l consistoriu ta somorguiáu nel procesu de llicitación de les obres necesaries pa estos equipamientos deportivos nel interior del complexu polideportivu municipal Vicente López Carril de Candás.
En primer llugar va procedese a la roza y llimpieza de la vexetación esistente nel ámbitu de les obres, retirando la capa de tierra vexetal qu'esista y atropándola pa la so posterior reutilización. De siguío, va siguise cola retirada de los vallaos, redes ya instalación eléctrica esistente, previa neutralización de la mesma y atroxu de los elementos d'allumáu pa la so posterior reutilización; según cola baltadera de los elementos de fábrica o pavimentos qu'interfieran col desenvolvimientu de les obres y cola nueva urbanización del ámbitu proxectada. Darréu va procedese, per medios mecánicos, a la explanación, perfiláu y niveláu de tierres que precise la nueva urbanización, según a la escavación de cabianes y pozos necesarios pa la execución de les cimentaciones ya instalaciones proxectaes.
La pavimentación de la pista de tenis va realizase por aciu formigón porosu, a base de tremáu de cementu y gravilla de granulometría escoyida, con una rimada tresversal continua y terminación/marcáu final por aciu l'aplicación de dos capes de pintura a base de resines con micro-grano d'alta densidá.
La nueva pista de tenis va abarganase perimetralmente por aciu un zarramientu de malla metálica plastificada, de simple torsión, de 40/14 y 4 m. d'altor sobro tubos galvanizaos en caliente y pintaos, recibíos al zuncho por aciu empotramientu mecánicu “in situ”. Esti zarramientu va tener una puerta de la so mesma calidá y dotada de pesllera.
Albandi
