Na mañana d'esti vienres 11 de xineru, presentóse nel salón de plenos del Conceyu de Carreño'l XXXV TROFÉU CLUB NÁUTICU CARREÑO -CTU. ASTURIES DE CROSS POR CLUBES 2019.

La participación va rondar los 300 atletes, dende categoríes cadete a senior, y va celebrase el próximu domingu 20 de xineru na Ciudá de Vacaciones de Perlora. El circuitu de Cross de Perlora, que na actualidá ye'l más antigüo no qu'al trazáu se refier de cuantos se celebren n'Asturies, va siguir siendo la prueba na que se clasifiquen los distintos equipos asturianos pal Cto. España de Clubes, que se va celebrar en Linares (Xaén) el 24 de febreru. Tola información de la prueba pueden atopala en www.cronelec.es y en www.fasatle.org 

La prueba va tar entamada pol Club Náuticu Carreño, cola collaboración del P.D.M. Carreño, Ayto. de Carreño y Federación Asturiana d'Atletismu ente otros. El consistoriu carreñense va contribuyir con una aportación económica estraordinaria de 1.100 € al club local designáu pola Federación rexonal como organizador de la prueba.

Na semeya qu'encabeza, d'esquierda a derecha: Luis Alfonso Prendes (Presidente del Club Náuticu), Adelino Hidalgo (Presidente Federación d'Atletismu del Principáu d'Asturies), Amelia Fernández  (Alcaldesa de Carreño), José Ramón Tuero (Director Xeneral de Deportes del Principáu d'Asturies) y David Muñiz (Sección d'Atletismu del Club Náuticu Carreño).