Remata'l taller de Bollería Duce, Roscón de Reyes, en Tamón

Según vase averando'l final de les Fiestes Navidiegues, los turrones, mazapanes, polvorones, peladilles, mantecaos, roscos de vinu, alfajores,... van dexando espaciu a unu de los dulces por excelencia de la gastronomía española nesta dómina y que d'una forma bien especial tástiase'l Día de Reyes. Esti nun ye otru que'l Roscón de Reyes.

Esti tradicional postre navidiegu foi'l protagonista del Taller de Roscón de Reyes, un monográficu sobre los distintos tipos d'ellaboración dependiendo del tipu de masa, el so rellenu, decoración,.... 
El taller desenvolvióse nel Centru d'Iniciativa Rural de la parroquia de Tamón esti vienres 4 de xineru. 

El "Roscón de Reyes" ye un bollu ellaboráu con masa duce, de farina, lleldu, azucre, mantequilla, güevos, arrayadura de cítricos, almendra y agua d'azahar, con forma de rosca y afatáu con rodaxes de fruta cristalizada (escarchada) o confitada de dellos colores. El Roscón orixinal o clásicu nun suel llevar nengún acompañamientu o ingrediente añedíu, pero dende'l postreru terciu del sieglu XX preparen variedaes con nata, crema, chicolate o cabello d'ánxel nel so interior.

Amás ye tradicional que nel so interior atopar pequenes “sorpreses” con un significáu bien especial. Nel casu d'atopar una faba, la persona que lu toque va ser quien tien de pagar el postre; ente que si lo que s'atopa ye una figurina, va querer dicir qu'esa persona va tener un bon añu.

Al Taller”, allegaron 26 persones procedentes de les distintes parroquies del Conceyu, el mesmu foi entamáu y financiáu pol Conceyu de Carreño, en collaboración cola Asociación Vecinal “El Xolín” de Tamón. 

Siendo la repostera responsable d'emponer al alumnáu por que sospriendan a les sos families nel día más máxicu del añu Esther Freile, de “Güen Tastu”.

“Güen Testu” ye'l nome baxu'l que la repostera Esther Freile dedicase a la impartición de cursos de repostería dende va venti años por toa Asturies. Formada nel Gremiu d'Artesanos Confiteros d'Asturies, acabó ente los primeres de la so promoción nos cursos de iniciación y perfeccionamientu impartíos por esti colectivu. Formación qu'a día de güei sigue faciendo asistiendo a cursos de reciclaxe y esperimentáu siempres p'anovar y aprender coses nueves. 

La temática de los sos cursos y talleres ye variada, tomando distintes materies como la Repostería, Conserves y llicores, Ellaboración y tresformamientu de derivaos lácteos, Panadería Artesanal, Cocina Creativa, Tapes y Pinchos, Dulces Navidiegos, ente otros.

Los talleres, qu'imparte Freile, son cursos onde l'alumnáu participa nes ellaboraciones, son  totalmente interactivos, pártese'l trabayu de manera que tol mundu pueda participar  y collaborar. A caúnu de les persones qu'asistieron al cursu de Tamón apurrióse-yos, en primer llugar un, recetariu, tanto con toles recetes colos ingredientes necesarios, como coles ellaboraciones para puedan poneles en práctica nes sos respectives cases.

Tres esi primer pasu, l'alumnáu dedicó unos minutos a conocer les distintes les técniques y los ingredientes qu'a lo llargo de la tarde diben utilizar. Una vegada repasaes les recetes partióse'l trabayu, poniéndose a ellaborar los distintos roscones. Amosando especial interés na resultancia final, nes decoraciones y na presentación de los mesmos. 

Una vegada concluyíu la ellaboración y presentación del dulce navidiegu, l'alumnáu tastió les distintes variedaes y comprobó in situ cuál ye'l so preferíu o con cuál celebrar el Día de Reis.