Ayudes del fondu européu marítimu y de pesca pa Carreño y Gozón

El Principáu d'Asturies publicó nel BOPA la convocatoria de concesión d'ayudes pa l'aplicación de les estratexes de desenvolvimientu local participativu de los Grupos d'Acción Local de Pesca en 2019 correspondiente al Fondu Européu Marítimu y de Pesca (FEMP) y qu'inclúi na zona de Cabo Peñes a los conceyos de Carreño y Gozón.

La convocatoria destina a los dos conceyos costeros un presupuestu total de 95.746,11€ pa les añalidaes 2019 y 2020. Pa proyectos de calter empresarial destínase un total de 46.660,00 €, pa entidaes locales 33.720,00 € y p'entidaes ensin ánimu d'arriquecimientu 15.366,11 €.

Les ayudes van ser tramitaes al traviés de l'Asociación pal Desenvolvimientu Integráu del Centru d'Asturies Periurbano (ADICAP)” y van poder ser subvencionables aquellos proyectos qu'encaxen dientro de la estratexa local participativa del grupu ADICAP como son proyectos de diversificación de la pesca, valorización del tresformamientu alimentariu y recursos pesqueros, proyectos medioambientales, etc.

Les ayudes van concedese en réxime de convocatoria abierta y en concurrencia competitiva. El plazu pa presentar solicitúes remata'l 4 de marzu de 2019. El programa ta cofinanciáu nun 85% con cargu al Fondu Européu Marítimu y de la Pesca de la Unión Europea y nun 15% con cargu al Principáu d'Asturies.