Esti sábadu, en Candás celebróse esti primer actu simultáneu en toa Asturies cola presencia de la Dtora. de Desenvolvimientu Rural, la candasina María Jesús Aguilar, l'Alcaldesa de Carreño y conceyales del consistoriu.
Nun importa qué alloñaos países acueyan a los asturianos y les asturianes, nun importa'l tiempu trescurríu nin los avatares que la vida impónganos. La sola imaxe de la sidra rompiendo contra'l cristal remembra en cualesquiera una amiestu de sensaciones sacando a la superficie de la memoria les emociones más personales y íntima de cada persona. Porque'l líquidu dorao tien el so sabor, el so golor, los sos cantares, pero sobremanera, supon una gociosa celebración de grupu, de l'amistá y de la vida mesma.
La Cultura Sidrera y l'Escanciáu de Sidra ye una de les señes d'identidá que meyor representa a Asturies nel mundu. Esa imaxe constitúi un poderosu símbolu de la nuesa tierra, nel que reconocemos y pol que nos identifiquen los de fuera.
"El Principáu d'Asturies consciente d'esti sentimientu, de l'ayalga de la Cultura Sidrera, quier que'l mundu conoza y reconoza los venceyos d'amistá universal d'esta bébora emblemática, sía cual fora'l llugar o'l momentu. Por ello punxo en marcha la Candidatura de la Cultura Sidrera Asturiana a la llista de Patrimoniu Inmaterial de la Unesco" - señaló l'Alcaldesa
Esta propuesta rexonal de Candidatura de la Sidra como Patrimoniu Inmaterial de la Humanidá tien dos ámbitos d'actuación:
· Alministrativu. La ellaboración, a cargu del Principáu, y presentación del espediente. Ye la parte científica y documental de la candidatura al traviés de la cual construyise de lo que significa la sidra como cultura.
· Social. Los sofitos a la Candidatura al traviés de la participación ya implicación de la ciudadanía, pos esta tien un mensaxe colectivu y espresa la voluntá del pueblu asturianu. Pa ello crearon la figura de EMBAXADOR/ES de la Candidatura en cada unu de los 78 conceyos.
El Conceyu de Carreño designó cómo embaxadores nel conceyu a l'Asociación de Sidra Casera de Carreño y a José Manuel Rodríguez Fernández, coordinador del rally de la sidra qu'entamen les Peñes marineres en Candás cada añu.
Carreño siempres tuvo fama de bona mano cola sidra. La prueba d'ello ye que nos años 20 hubo casi 90 llagares rexistraos oficialmente. Ensin cuntar aquellos otros totalmente caseros de los que nun había constancia llegal. Anguaño queden dos profesionales, n'El Valle y Albandi, pero son munchos los ellaboradores que caltienen la tradición d'ellaborala en casa. Naquellos años 20 la sidra carreñense tenía característiques propies, un estilu distintu al del restu d'Asturies. Nos sos caldos predominaba un color acoloratáu, fuerte sabor ya intensu arume de resultes de ciertes variedaes de mazanes. Colos años el gustu de la población foi variando escontra unos caldos más pálidos con un sabor más nidio, nos que tenía que ver una esmerada ellaboración y l'usu de la técnica de los trasiegos, hasta esi momentu ensin utilizar na mayoría de los llagares de Carreño. Unos caldos similares a los qu'a día s'ellaboren nos nuesos llagares.
Pero l'actividá sidrera de Carreño non yá se circunscribe a estos dos llagares profesionales, sinón que nel Conceyu esisten una variedá d'actividaes centraes nel líquidu dorao. Una cita obligada tantu nel branu candasín como nel asturianu ye la celebración del “Rally de la Sidra” mientres les Fiestes de San Félix nel mes d'agostu.
Trátase d'un acontecimientu popular y eminentemente festivu al empar que defensor de la sidra asturiana como elementu significativu de la nuesa rexón. Ye entamáu pola Peñes Marineres so la coordinación de José Manuel Rodríguez. Y en el qu'añu a añu confirma'l so puxanza y caláu na sociedá, aumentando'l so númberu de participantes. Na última edición, 2018, casi 10.000 botelles de Sidra Peñón, fueron les que 2.500 persones tastiaron n'este rally poles cais de Candás nel que destaca la diversión l'ambiente de folixa, la rises, la música y sobremanera l'amistá.
Mención tamién merez l'Asociación de Sidra Casera de Carreño, que na so curtia esistencia de vida, foi creada nel 2017, atesora un ensin fin d'actividaes nes que'l protagonismu céntrase na sidra casera. Creóse so la premisa de promover, desenvolver actividaes y eventos nos que se dea a conocer y promociónese la sidra casera, col oxetivu sacar del olvidu la tradición sidrera del conceyu. Nel
añu 2016 tres l'ésitu de participación na I Degustación de Sidra Casera de Carreño, celebrada'l primer domingu d'agostu na parroquia de Perlora, los vecinos y vecines en que les sos cases siguen faciendo sidra decidieron xunise y crear “l'Asociación” so la presidencia de Félix Muñoz. Nestos trés años nun pararon y na III Degustación celebrada'l pasáu branu'l númberu de participantes de les distintes parroquies llegó a la ventena. Participando ese mesmu añu, como convidaos, nel Concursu de Sidra Casera de Piloña. Amás como complementu a les Degustaciones de sidra entamaron delles esposiciones d'elementos funcionales de llagares y delles charres y cursos nos que el pumar foi'l protagonista. Destacando'l cursu sobre la fradadura y los ensiertos y la charra sobre les enfermedaes y les plagues en frutales, principalmente nel cultivu del pumar.
Na actualidá dos son los llagares profesionales que tien la so see nel Conceyu de Carreño:
· Sidra Peñón na parroquia de Albandi. Fundáu en 1910 por Francisco Glez. Prendes, siendo'l so nietu Miguel Glez. Álvarez el verdaderu impulsor del llagar y el que-y dio sonadía. Que la so trayectoria profesional viose reconocida en dos ocasiones, la primera en 1976 cuando ye nomáu Oficial de la Orde del Méritu Agrícola y la segunda en 1990 al ser el primer galardonáu col premiu Llagareru d'Oru nel trescursu de la primer edición de la Fiesta de la Sidra Natural de Xixón. Tres el so fallecimientu en 1991, son los sos fíos quien siguen al mandu de la empresa trabayando día ente día pa faer d'ella una empresa moderna y competitiva, con una capacidá de producción en redol a 1.000.000 de llitros. Y en l'actualidá la quinta xeneración, al traviés d'Arturo, yá se ta preparando pa tomar el relevu y siguir col negociu familiar.
· La Hacienda de la Abuela na parroquia d'El Valle y que fabrica sidra que comercializa como Sidra Guimarán. Empezó la so andadura n'Ochobre del 2010. Ye frutu d'un proyectu que se foi escurriendo y maureciendo amodo, nes comíes familiares de los domingos, cola idea d'anovar y dar sentíu y un xiru radical a la finca sobre la que s'asitia y que mientres 40 años dedicóse a esplotación agrícola y ganadera. Empezaron llantando pumares de D.O.P., embaraxando distintes idees hasta qu'a la fin naz La Hacienda de la Abuela. Unas instalaciones nes que se compaxina la ellaboración de la sidra cola celebración de espichas.
El llabor tanto de Félix y l'Asociación de Sidra Casera de Carreño como de “Manolo” va ser la de dar sofitu y xestionar l'espardimientu de la candidatura nel nuesu conceyu. Van Ser los encargaos de la xestión del llibru de firmes de sofitu, la coordinación col restu d'asociaciones o entidaes na recoyida de sofitos, entrega de los distintivos a los establecimientos que sofiten a la candidatura, distribución del material informativu y promocional y la de participar tantu a nivel rexonal como nel conceyu nes actividaes que se programen.
Pa simbolizar el primer sofitu colectivu del conceyu a la cultura sidrera fíxose un escanciáu simultáneu con 12 persones una per cada parroquia. 12 escanciadores que, al pie de l'Alcaldesa de Carreño y la Directora Xeneral, echaron un culín na escalinata Jesús García Prendes.
Tastióse sidra de Carreño y unos mini bollinos preñaos hasta rematar esistencies y percanciáronse firmes de sofitu.
Quienes lo deseyaron tomáronse una semeya nel Photocall vencíu pola Asociación de Sidra Casera pa compartir en redes sociales.
Les 12 persones qu'echaron cola Directora y Alcaldesa:
- Por Tamón Luis Mariano Leya
- Por El Valle: Álvaro Rodriguez de casa Peperrita
- Por Perlora: Rosana Muñoz de casa Cagarriales
- Por Carrió Rubén González de #casa Trasona -
- Por El Pieloro Gabino González ( fíu) de casa Gabino
- Por Ambás: Luis Roberto Álvarez de casa Lunardo
- Por Candás Beatriz Fernández “ Bea la del Maño”
- Por Albandi Dositeo García -
- Por LLorgozana Miguel Iglesias, directivu de la entidá vecinal
- Por Priendes Toño Morán de Casa Morán
- Por Quimarán Alfredo Hevia, directivu de la entidá vecinal Dolmen y de casa Garita
- Por Prevera José Luís González