Carreño, conceyu cardioprotexíu, tecnoloxía sanitaria y formación

L'Ayuntamientu de Carreño pon en marcha'l proyectu “Carreño Conceyu Cardioprotexíu” enmarcáu ente les distintes acciones que'l Conceyu de Carreño vien realizando desque en 2016 xuntóse a la Estratexa pa la Promoción de la Salú y Prevención del Sistema Nacional de Salú, coles mires de promover una sociedá na que les persones, les families y les comunidaes puedan algamar el so máximu potencial de desenvolvimientu, salú, bienestar y autonomía, y na que trabayar pola salú asumida como xera de toos y toes, desenvolviendo progresivamente intervenciones identificaes como bones práctiques.

Con esti proyectu, amás de dotar a les principales zones deportives del conceyu de dispositivos de Desfibrilación Esterna Automática, conocíos tamién como DEAs, pretende formase a la población nel manexu de los mesmos y en primeros auxilios.

Los dispositivos de desfibrilación emplazaránse en 5 allugamientos, el Polideportivu “Vicente López Carril” de Candás, el Centru de Persones Xubilaes “El Paseín” de Candás, sito nel Centru Polivalente “La Baragaña” y les pistes polideportives del CIR Monte Areo, Prevera y Albandi.

Amás de la dotación tecnolóxica, van realizase cursos de soporte vital básicu nos llugares onde se van asitiar los dispositivos pa formar a la población pa una rápida actuación en casos d'emerxencia, y nos que va poder participar aquelles persones que la deseyen, pa lo cual tendrán d'apuntase o bien telefónicamente o presencialmente nel Centru Polivalente “La Baragaña” de Candás. Los talleres programaos son los siguientes:

Llugares y Feches:

Centru Polivalente “La Baragaña” (nel salón del Centru de Persones Xubilaes “El Paseín”)
8 de Febreru de 17:00-18:30 h.

CIR Albandi
11 de Febreru de 11:00 a 12:30 h.

CIR Prevera
12 de Febreru 17:00 a 18:30 h.

CIR Monte Areo
15 de Marzu 18:00 a 19:30 h.

Los conteníos que se van tratar en cada taller son:

1. Conocencies básiques de la fisioloxía cardiaca 
2. Enfermedaes más frecuentes del corazón que provoquen parada cardiaca 
3. Formes de prevención
4. Soporte Vital Básicu 
5. Atragantamientu 
6. Accidentes: Hemorraxes, quemadures, traumatismos, etc.
7. Reanimación Cardiopulmonar (RCP)

Amás de la formación vecinal, nesti proyectu contémplase tamién el realizar una capacitación nel manexu de desfibriladores “Cursu de acreditación del DEA” destináu a los as monitores de les Escueles deportives, según un taller de Acreditación d'usu de los DEAs empobináu a personal llaboral del Conceyu de Carreño pa formar a personal del Polideportivu, el Centru Polivalente, responsables de los CIR  y monitores de los cursos de Xerontoximnasia por que conozan el funcionamientu y la forma d'utilizar los aparatos.