Carreño va visibilizar a muyeres pa quitase'l sombreru

Nel conceyu de Carreño, l'artista plástica Beatriz Castro, peracaba un proyectu espositivo y audiovisual pal Consistoriu carreñense que trata sobre “Les Ensin Sombreru”: un grupu de muyeres artistes intelectuales españoles, pertenecientes a la xeneración del 27.

La Biblioteca Municipal “Carlos González Posada” xuntu col Centru Escultóricu “Muséu Antón” de Candás van convertise nun improvisáu plató de cine al ser l'escenarios escoyíos por Castro pal rodaxe un vídeu promocional que va acompañar a la esposición “Muyeres pa quitase'l sombreru”.

Nél participen una decena de muyeres del conceyu que se caracterizaron pa dar vida aquelles muyeres pintores, ilustradores, poetises, escritores, ensayistes, guionistes,… muyeres rompedores, modernes pal so tiempu, precursores del movimientu feminista español, les llamaes “Les ensin sombreru”.

Dientro de les actividaes programaes, pola Conceyalía d'Igualdá, pal mes de marzu pa conmemorase'l Día Internacional de la Muyer, el Centru Polivalente “La Baragaña” va acoyer dicha esposición de l'artista plástica, que mora en Candás, Beatriz Castro Rodríguez.

“Les Ensin Sombreru” ye'l nome col que son conocíes un grupu de muyeres artistes intelectuales españoles, pertenecientes a la xeneración del 27. El nome respuende al xestu de quitar el sombreru en públicu que protagonizaron Maruxa Mallo, Margarita Manso, Salvador Dalí y Federico García Lorca na Puerta del Sol. La mesma Mallo esplicólo de la siguiente manera “Un día asocediónos a Federico, a Dalí, a Margarita Manso y a mi quitar el sombreru porque decíamos que paecía que tábamos conxestionando les idees y, travesando la Puerta del Sol, apedriáronnos llamándonos de too”. El xestu, de quitar el sombreru, convirtióles en rebeldes, especialmente a les muyeres. Pa elles, prescindir del sombreru implicaba abandonar el corsé de la dómina, y, por tanto, nun conformase col papel d'esposes y madres. 

Madrid foi la ciudá onde la gran mayoría d'elles moraron, estudiaron y desenvolvieron la so actividá artística. Abiertes a nuevos conceutos de modernidá y a les corrientes de vanguardia que proveníen d'Europa, fueron tamién recuperadores de la tradición popular. Fondamente comprometíes col so tiempu y la so realidá social, la so actitú foi rompedora y abierta, tresformando'l panorama cultural y artístico d'una España convulsa. 

Les aportaciones d'esti colectivu femenín tán inda poco estudiaes y, na so gran mayoría, quedaron al marxe de les antoloxíes y los manuales d'arte y lliteratura hasta los nuesos díes, anque desenvolvieron una actividá constante y destacada en campos tan variaos como la escritura, la pintura, la escultura, la ilustración o la filosofía. D'ende que la propuesta de l'artista paeciónos bien atinada p'amosala en Carreño'l próximu mes.”  – esplicó l'Alcaldesa de Carreño.

Ente les muyeres que tuvieron esi enorme pesu na vanguardia artística de principios del sieglu XX atópense: 
• Maruxa Mallo (Vivero 1902-Madrid 1995), pintora
• Rosario de Velasco (Madrid 1904-Barcelona 1991), pintora 
• Marga Gil Roësset (Madrid 1908-Las Rozas 1932),escultora, ilustradora y poeta
• María Zambrano (Vélez-Málaga 1904-Madrid 1991), filósofa 
• María Teresa León (Logroño 1903-Madrid 1988), escritora
• Josefina de la Torre (Gran Canaria, 1907-Madrid 2002), poeta 
• Rosa Chacel (Valladolid 1898-Madrid 1994), escritora 
• Ernestina de Champourcín (Vitoria 1905-Madrid 1999), poeta 
• Concha Méndez (Madrid 1898-México 1986), escritora; 
• Margarita Manso (Valladolid 1908-Madrid 1960), pintora 
• Ángeles Santos (Portbou 1911-Madrid 2013), pintora y artista gráfica” – añedió Amelia Fernández.

El vídeu promocional que se ta rodando amuesa a estes muyeres nos salones esclusivos onde s'axuntaben y compartíen idees. Centros nos que se xestó la grana del tresformamientu femenín de delles xeneraciones y el camín de la igualdá de derechos. Vamos Ver como la Biblioteca Municipal “Carlos González Posada” y el Muséu Antón conviértense na Residencia de Señorites, el grupu femenín de la Residencia d'Estudiantes, nel LyceumClub Femenín o l'Asociación Universitaria Femenina. Espacios nos que Manso, Mallo, Velasco, León,… pintaben, escribíen, o a cencielles intercambiaben opiniones “ – prosiguió Fernández.  

La dirección y guion del vídeu son de la mesma autora de la esposición, Beatriz Castro. La cual participó xuntu con otres 9 muyeres, caracterizaes acordies con los estándares de la dómina, na so grabación. La realización y filmación de les imaxes correspondió al camarógrafu Tarek Halabi.

Les resultancies, vamos veles el próximu sábadu, 9 de marzu na inauguración de la esposición “MUYERES PA QUITASE'L SOMBRERU”.