Superpín, l'héroe de Prevera

El Superhéroe asturianu “Superpín” encandiló al públicu de Prevera. So la dirección de Josefina Lombán L'Asociación Cultural  “El Hórreo” de Barcia-Valdés consiguió arrincar más d'una risada acompañada de dalguna qu'otra llárima, pero llárimes de risa, a les persones asistentes a la cuarta función de la “XIV Ronda Teatral per Carreño”

La función, que tuvo llugar, nel Centru d'Iniciativa Rural de la parroquia a les 19:00 hores cuntó cola presencia en representación del consistoriu carreñense, entidá qu'entama y financia dicha actividá cola collaboración de l'Asociación Vecinal San Juan de Prevera, de la Conceyala de Cultura Cecilia Tascón.

"La Ronda de Teatru ye un programa cultural que'l so oxetivu ye llevar arte y cultura a la zona rural. Una llínea de trabayu al traviés de la cual tamos apostando pola descentralización de los servicios públicos y de xacíu de la cultura. Una llínea cola que pretende consiguise un accesu de tola ciudadanía, n'igual de condiciones, a unos servicios públicos de calidá. Una forma d'entender la sociedá na que la persona nun tien que movese de la so redolada p'asistir a una función teatral, sinón que ye l'actividá la que se mueve a la so redolada, hasta los Centros Sociales de les Parroquies” señaló Cecilia Tascón- Conceyala de Cultura. 

Teatru, poesía, música, talleres, charres, cursos  y esposiciones son dalgunes de les acciones que nesi enfotu venimos desenvolviendo conxuntamente col vecinderu. Una confluencia de sinerxes, positives, ente les asociaciones vecinales, la ciudadanía y los Grupos de Teatru, nesti casu, nel que se pon de relieve la importancia y el valor d'estos alcuentros culturales como una forma de dinamización de la parroquia” prosiguió la edil.

Les diez sesiones de la que consta la Ronda entámense otramiente, una primer parte na que'l protagonista son los monólogos o'l cantar asturianu pa siguir con una representación teatral al cargu de grupos de teatru con una dilatada trayectoria y de reconocíu sonadía nel panorama asturianu. Na xornada del sábadu los protagonistes teatrales fueron los monólogos de José María Montes Presa “Chema Fonsagrá”, pa de siguío xubise al escenariu l'Asociación Cultural  “El Hórreo” de Barcía” comentó Tascón.

L'Asociación Cultural de Valdés, so la dirección de Josefina Lombán representó la obra “Superpín” del dramaturgu asturianu José Ramón Oliva. Na que, nuna dómina na que primen los intereses individuales sobro los colectivos, apaez Pin. Pin vive nuna aldega arrodiáu de vecinos y vecines que la aprecien. Tien una pasión que son les hestories de comic de superman y viendo qu'esisten delles inxusticies decide convertise nel Superman del so pueblu y ayudar a la vecindá. Pero como diz el refrán “quien se mete a redentor…siempres sale sacrificáu”.

“El Hórreo” naz en 1980, siendo unu de los referentes del meyor teatru popular asturianu. Foi la primer compañía, xuntu col GT “Xana” de Perlora, la Compañía Asturiana de Comedies  y GT de Tapia de Casariego que participaron nel I Salón de Teatru Costumista Asturianu de Candás nel mes d'abril de 1991.

A día de güei siguen calteniendo vivu l'espíritu col que foi fundada, convirtiéndose por méritos propios, en referente cultural de primer orde nel occidente asturianu. Dando fe d'ello los numberosos premios y reconocencies, qu'a lo llargo d'estos años, collechó por toa Asturies, España ya Hispanoamérica.

Con esta obra consiguieron alzase na última edición del Salón de Teatru Costumista de Candas col Premiu Aurora del públicu.

Pela so parte el sierense José María Montes Presa “Chema Fonsagrá” ye un monologuista asturianu que dedicó tola so vida a la docencia, permaneciendo dellos años en Marruecos como director del Colexu Español Luis Vives, onde foi amás Presidente de la Casa d'España y la redolada onde recitaba monólogos de Ánxelu, Teodoro Cuesta , Carlos de la Concha o de la so propia creación. 

Ye autor de nutríu númberu de monólogos acomodaos a los tiempos y vivencies de l'actualidá. La so aportación al mundu del monologuismu asturianu ta centrada na actualización d'eses temes y la renovación de la métrica como una forma de faer que'l xéneru, que nació nel mundu rural pueda supervivir na actualidá.  Esto viose reflexáu nel 2016 cola publicación de la so obra “Como Ye la vida” publicación que recueye cinco de los sos monólogos ente los cualos destaca “Mitin de Chema Fonsagrá”.