La próxima comisión d'Urbanismu, que se va celebrar el xueves 21 de febreru a les 9:30 hores, va encetar la problemática de los edificios de viviendes númeru 10,12, 14, 20 y 24 de la cai Carlos Albo Kay en relación cola necesidá de regularizar la rede de saneamientu.

“Ye importante atopar una solución a esti problema qu'afecta directamente a la rede de saneamientu de Candás y que mientres el branu de 2014, arriendes de los arramaos detectaos na sablera Palmera provocó la prohibición de bañu”, esplicó Cecilia Tascón, Conceyala d'Urbanismu.

“Pa ello como Presidenta de la Comisión, convoqué a Presidentes de caúna de les comunidaes implicaes y nel so defectu a  alministradores de finques, por qu'asistan a la xunta na que tamién van tar presentes representantes de los grupos políticos con representación nel Consistoriu y el personal tanto técnicu como xurídicu del Conceyu”, señaló Cecilia Tascón.

“L'oxetivu d'esta xunta ye analizar la situación nes que s'atopen estes viviendes en cuanto al saneamientu ya intentar regularizala, buscando la meyor solución técnica posible de tala manera que sía posible al curtiu plazu y asina poner fin a una problemática que se vien produciendo dende'l 2014”, remató la Conceyala.