Alumnáu de cuartu cursu del colexu San Félix de Candás intercambia, n'inglés, conocencies sobre la Antártida.
Yera un 15 d'avientu de 1982, un día gris, escuru, cuando la Goleta “Idus de Marzo” faía la so partida del puertu candasín no que sería la Primer Espedición Científica Española a la Antártida, llegando'l 4 de marzu de 1983 a les Isles Shetland del Sur del continente xeláu. Percorriendo delles bases polares, que s'atopaben nel archipiélagu, como Badea Yankee, Badea Foster o la Isla Decepción.
Pos, 36 años dempués d'esi primer viaxe, l'alumnáu de cuartu cursu del Colexu San Félix de Candas pudo almirar la mesma guapura que los tripulantes del “Idus de Marzo” vieron na Isla Decepción al traviés d'una videuconferencia cola Antártida, col destacamentu destináu na base española del exércitu de tierra“Gabriel de Castilla” na so “XXXII Campaña Antártica”, la más antigua d'esta institución.
Ente 1989 y 1990 instalóse na Isla Decepción l'abelugu militar “Gabriel de Castilla” pa sofitar los trabayos d'investigación y llevantamientos topográficos qu'ellí se taben realizando. Permaneciendo namá ocupada pel branu austral por 32 persones, 16 militares pertenecientes al Exércitu de Tierra, que ye quien entama y dirixe la Campaña Antártica; y por 16 científicos coordinaos pol Comité Polar Español.
La función del personal militar mientres la Campaña ye la de caltener les instalaciones, amás tienen encamentada la misión asegurar y protexer la estancia del personal científico, que tienen delles investigacionesabiertas, dende'l control de l'actividá sísmica, el cambéu climáticu o'l comportamientu de los aerosoles.
Paralelamente a estes actividaes, el personal de la base collabora na campaña solidaria “Apadrina un pingüín” que los sos fondos recaldaos van íntegramente a la llucha contra'l cáncer. Nesta ocasión el Colexu San Félix apadrinó a dos pingüinos que los sos nomes van ser Picopico y Copito.
Mientres la videuconferencia l'alumnáu de cuartu cursu fixo “un tercer grau” n'inglés a los militares, preguntaron tou tipu de cuestiones, interesándose por cómo ye la isla, les temperatures tan estremes que sufren, cómo pasen los ratos llibre que disponen, les comíes, los proyectos que lleven a cabu, o como son les instalaciones. Esta última cuestión foi bono de responder una y bones l'alumnáu pudo conocer como ye la base per dientro y per fora emponiéndolos al traviés d'un tour.
La precursora d'esta iniciativa foi la profesora d'inglés Diana García Rodríguez, pero tamién participaron na actividá dellos departamentos del centru educativu, como por casu el d'informática.
Albandi
