Candás acueye una xornada formativa del 112 Asturies sobre los Planes d'Emerxencia Esterior de les empreses químiques

 “CONFÍNATE, PROTÉXITE Ya INFÓRMATE” ye'l títulu de la Xornada Formativa del 112 Asturies
El desenvolvimientu de la sociedá occidental nos últimos años producióse gracies a les meyores tecnolóxiques. Dalguno d'ellos dexó'l llogru de productos que contribúin a la meyora de la calidá de vida de les persones como son les melecines, los deterxentes, les pintures, les fibres testiles, los plásticos, los carburantes,… toos ello llógrense al traviés de procesos industriales de naturaleza química.

Nesti sentíu'l Principáu d'Asturies cunta con importantes industriales que constitúin una notable fonte de riqueza y empléu. Para desenvolver la so actividá utilicen determinaes sustances o compuestos que, en situaciones escepcionales y en cantidaes abondes, pueden llegar a provocar accidentes. Para prevenir esti tipu de situaciones, estes instalaciones cunten con PLANES d'Emerxencia tanto Interiores como Esteriores, nos que s'establez la organización, los medios, y los recursos destinaos a controlar y apangar los efectos del accidente y les sos consecuencies.

Nel casu de los Planes d'Emerxencia Esterior de les empreses d'estes característiques, lo que se conoz como'l PLANQUIMPA, éstos, fueron ellaboraos pol “112 Asturies” en collaboración coles empreses integraes na Mesa de Trabayu para la implantación de los Planes d'Emerxencia Esterior (PEE).

Frutu del trabayu lleváu a cabu por estes Meses de Trabayu nel añu 2018 surdió'l plan d'implantación d'un sistema de señales acústiques d'avisu a la población en casu d'accidente grave, 2018-2020, nel ámbitu xeográficu onde s'alluguen estes empreses. Para ello estrémase en 4 zones el territoriu d'Asturies nel que tán enllantaes estes 15 empreses: zona d'Avilés; zona de Xixón-EL Puertu; zona d'Uviéu; zona Belmonte-Tinéu. D'eses 15 empreses, 4 atópense enllantaes nel nuesu Conceyu, na zona Oeste Dupont, ArcelorMIttal Avilés; na zona Este ArcelorMIttal Xixón y Térmica Aboño CTA.

El Plan consta tantu de la implantación d'una serie de señales acústiques dientro de les mesmes empreses como nel esterior de les mesmes  coles mires d'avisar a la población nel casu d'un accidente como de la campaña d'información a la ciudadanía sobre qué faer nestos casos “CONFÍNATE, PROTÉXITE Ya INFÓRMATE”.

Esta campaña informativa empobinada a les poblaciones cercanes a les industries químiques presentóse na Casa de la Cultura de Candás.  

Nella, participaron los axentes sociales del conceyu implicaos: asociaciones vecinales de de les  parroquies colindantes a estes industries químiques, Policía Local, y el responsable del serviciu médicu de la Mancomunidá del Cabu Peñes que coordina la mesa ínter sectorial de salú.

Nesta xornada formativa entamada pol Serviciu d'Emerxencia del Principáu d'Asturies (SEPA) xuntu col Conceyu de Carreño cuntóse cola charra de divulgación impartida pola Técnicu de Protección Civil Ana Marrero y cuntó, amás, cola presencia de Rodrigo Vega,  Xefe de Protección Civil; el xerente del SEPA, Eugenio García; y en representación del Consistoriu la conceyala d'urbanismu, Cecilia Tascón y el conceyal de Seguridá Ciudadana, Onésimo Velasco.

Mientres la formación, el xerente del SEPA, esplicó les característiques del Plan, que tien una vixencia de trés años. Consta d'una inversión inicial de 1.200.000 €, de los qu'el 90% ye apurríu poles empreses implicaes, y el 10% pol Organismu Autonómicu, tanto para la implantación de les señales acústiques como del sistema informáticu, tecnolóxicu, control de les señales o la campaña d'información a la ciudadanía. Dio a conocer el númberu y onde s'alluguen les distintes señales nel Conceyu, el so ámbitu d'actuación, decibelios de les mesmes,… esplicando les que yá tán enllantaes dende'l 2018 como ye'l casu de les de la zona de la Térmica d'Aboño o les de Dupont, o les qu'a lo llargo d'anguaño 2019 van instalase, el casu por casu de les de ArcelorMittal Xixón.

Pela so parte Marrero, la técnica de Protección Civil, fixo xuna esposición esplicativa sobre la campaña d'información “CONFÍNATE, PROTÉXITE Ya INFÓRMATE”. Empezando en cómo suena la sirena en casu d'accidente, la so duración y lo que la ciudadanía tendría de faer nestes situaciones hasta que vuelve sonar anunciando'l fin del accidente que provocó l'alarma. Para continuación pasar comentar lo que tendríamos de faer y lo que non.

Cuando se produz un accidente grave, nestes empreses, pol qu'haya qu'activar el PLANQUIMPA, la ciudadanía de la redolada, al traviés de les señales acústiques cercanes a la so casa va oyer xuna serena 1 minutu, va parar unos segundos, volverá sonar otru minutu, volverá parar 10 segundos y volverá sonar un minutu más. Nesti momentu hai trés coses importantes que realizar:


1.- CONFÍNATE: Abelúgate en casa o nel local más próximu. Y si ye posible, xube a los pisos más altos.
2.- PROTÉXITE: Cierra puertes y ventanes. Asitia paños húmedos nes rendijas. Y desconecta gas y corriente.
3.- INFÓRMATE: Conecta una radiu a piles para tar informáu y sigue les instrucciones de Protección Civil.

Al igual qu'hai unes acciones que realizar hai otres que NUN se deben faer:

·         Nun salgas a la cai hasta escuchar el fin de la emerxencia.

·         Si tas nun edificiu públicu nun lu abandones hasta recibir instrucciones.

·         Nun uses el teléfonu móvil sacantes sía puramente necesariu.

·         Nun fumes nin enciendas nengún tipu de llapada.

·         Nun encender electrodomésticos.

Una vegada que pasó'l peligru la población afectada va oyer de nuevu una sirena, distinta a la que da entamu la situación, mientres 30 segundos. A partir d'esi momentu l'alerta remataría y podrá volvese a los queferes diarios.

El Xerente del SEPA anunció que, anque ta entá por determinar la fecha concreta, posiblemente a finales de marzu realizárase xuna prueba de les señales acústiques yá instalaes. Ante una posible alarma social, díes antes d'esti simulacro, va avisase  a la  ciudadanía, al traviés de los Conceyos, de los medios de comunicación,… del día y hora en que van sonar les serenes y van faese los simulacros.

Pa rematar la sesión fíxose entrega al públicu asistente d'un trípticu esplicativu de la xornada. Los cuálos nos próximos díes van ser distribuyíos pelos Centros d'Iniciativa Rural  de les Parroquies, Centros Municipales, Centros Educativos, Sanitarios,….