Nel Salón de Plenos del Conceyu de Carreño anovóse apocayá l'alcuerdu de collaboración ente'l Consistoriu local y la Banda de Gaites Candás. Esti compromisu cultural, per parte de dambes entidaes, tuvo llugar cola robla dixital del Presidente de la Banda de Gaites Candás, Daniel García Vega y Amelia Fernández, Alcaldesa del Conceyu de Carreño. Dambos roblaron dixitalmente el nuevu conveniu de collaboración.

Dichu alcuerdu tien por oxetu impulsar l'estudiu y promoción de la música y cultura asturiana, el sofitu al llabor educativu que la entidá cultural fai de la música tradicional, y a la celebración añal del festival de gaites “Villa de Candás”, por aciu la concesión d'una ayuda económica pa collaborar na realización de les sos actividaes.

Por ello, el Conceyu de Carreño va faer una aportación de 28. 235 € pal exerciciu 2019. Y a cambéu, la Banda de Gaites Candás comprométese a la organización del Festival de Banda de Gaites “Villa Candás” y a la realización d'un total de 14 actuaciones gratuites mientres el presente añu en distintos eventos y parroquies del Conceyu. La Banda de Gaites va ufiertar 8 actuaciones, ente que pa la Bandina el númberu d'actuaciones va ser de 6.

Coles mesmes, la entidá ufierta un descuentu especial d'el 30%, pal restu de les sos actuaciones que'l consistoriu de Carreño contratase, en toos aquellos eventos celebraos nel Conceyu o fora d'él pa la so promoción o intercambiu cultural.

“Una vegada más dende'l Consistoriu sofita a les entidaes culturales del Conceyu, entidá que promociona daqué tan nuesu como ye la cultura, la música, les tradiciones asturianes, llevando'l nome de Carreño allá per onde quieran que van. D'esta forma la vecindá va poder esfrutar a lo llargo de too l'añu de los conciertos, pasacais, y de xacíu d'una nueva edición del Festival de Banda de Gaites Villa Candás qu'entama l'asociación” señaló Amelia Fernández

La Banda de Gaites Candás nació en 1989 coles mires de impulsar l'estudiu y promoción de la música y cultura asturianes. Na actualidá cunta con más de trenta componentes, y escolinos que se prepararen, pa formar parte d'ella, na so escuela de música tradicional asitiada nel faru de Candás.

El so repertoriu componse básicamente d'adaptaciones harmonizaes de temes tradicionales asturianos, incorporando tamién dalgunos d'otres cultures del Arcu Atlánticu, solos de percusión y composiciones orixinales.

El so director ye Velu Muñiz y nel so currículu consta'l ser Campeonos de Asturies nel III Campeonatu Nacional de Bandes de Gaites Asturianes, Campeones na 1ª Fase de la XIV Lliga de Gallega de Bandes de Gaites na so 1° Grau, Campeones nel 1º Grau del Campeonatu de Bandes de Gaites de la XXIV Edición del Festival del Gaiteru de Sotuelo (Pontevedra 2003) y ser la primer banda asturiana en competir n'el 1° Grau de la Lliga Gallega de Bandes de Gaites.

Nel 2015 consiguieron el PREMIU AMES 2015” (Anuariu de la Música d'Asturies) nel apartáu de Gaita. Los Premios Ames son los premios oficiales a la música asturiana que s'apurren cada añu dende'l 2005.

Tolos branos, dende 1997, entamen el Festival de Bandes de Gaites Villa de Candás. Festival que foi declaráu a instancies del Conceyu de Carreño pol Gobiernu del Principáu como Fiesta d'Interés turísticu rexonal. Esti Festival ye l'únicu n'Asturies que se celebra dedicáu puramente a Bandes de Gaites. El festival tien una peramplia repercusión a nivel nacional ya internacional, nél participaron agrupaciones d'Asturies, Galicia, Llión, Mallorca, Bretaña, Irlanda y Escocia.

“Amás de la renovación del conveniu, nesta primer xunta cola nueva directiva de la Banda encetemos otres temes d'interés pal colectivu. Repasamos les resultancies de les obres nel edificiu d'El Faru, que'l so usu vencimos como see pa l'asociación cultural y llugar d'ensayu. L'Autoridá Portuaria de Xixón, como propietaria del inmueble, realizó arreglos pero entá queden cuestiones por concluyir que volveremos retomar cola propiedá del inmueble. Tamién nos plantegaron la realización d'una serie d'actividaes con motivu del XXX Aniversariu de la fundación de “la Banda” como pueden ser la organización del Día del Sociu o un posible conciertu a finales d'añu pa festexar la onomástica. Trenta años formando musicalmente a xeneraciones de carreñenses merez conmemoralo con actividaes abiertes al esfrute vecinal” rellató L'Alcaldesa.

“A estes propuestes hai qu'añedir que dende la nueva directiva de l'Asociación, ta trabayándose nun posible intercambiu cultural ente Carreño y el Centru Asturianu de Málaga, que podría tener llugar na ciudá andaluza a finales del mes de setiembre. Esti tema xunta cola organización del Festival de Banda de Gaites va encetase más en tientes nuna nueva xunta en próximes feches. Va Ser nel mes de Mayu cuando visite'l nuesu conceyu'l presidente de esi centru” remató la primera edil.