El próximu vienres, 17 de mayu a les 19:30 h., va tener llugar nel Centru d'Escultura de Candás, Muséu Antón la inauguración de la esposición “Bosquejos” de Carmen Castillo.

La esposición ye una instalación escultórica compuesta por delles pieces antropomorfes a escales diverses que, distribuyíes de manera intencional, xeneren una conexón física y simbólica cola persona pa convidar al interés y, según lluz y mirada, al plasmu tentador.

 Les persones visitantes enfúsense nun universu autu-conteníu, ensin suxerencia dalguna qu'imponga un abordaxe determináu, dexando al receptor a soles cola so propia percepción, la so intransferible sensibilidá y apropiación.

Carmen Castillo, de formación autodidacta, a lo llargo de 30 años formóse puramente cola mesma esperiencia, trabayando nuna única especialidá: la escultura. La so obra, caracterízase por ser d'inspiración minimalista, na que s'impon el bronce como material dominante, que se va complicando pasu ente pasu en pos d'una clara voluntá escenográfica.

Una ventena de les sos obres tán instalaes n'espacios públicos de delles ciudaes españoles y tamién fora d'España, en ciudaes d'Alemaña, Holanda y Portugal.

Les sos esculturespueden atopase nel Muséu d'Arte Contemporaneo de Salamanca, Muséu V Centenariu d'Huelva, Muséu d'Escultura de Aracena, Muséu d'Escultura de Alcalá de Henares, Muséu d'Escultura al aire llibre de Cáceres, ente otros.

La esposición, va poder ser visitada nel Centru d'Escultura de Candás, Muséu Antón hasta'l 14 de xunetu.

L'horariu de visites mientres el mes de mayu ye de martes vienres de 17:30 a 19:30 h., sábados, domingos y festivos de 12:00 a 14:00 h. y de 17:30 a 19:30 h.

Nel mes de xunu, l'horariu ye de martes a domingos de 12:00 a 14:00 y de 18:00 a 21:00 hores.

La entrada ye gratuita.