Dos nuevos proyectos europeos Leader pal Conceyu de Carreño

El Conceyu de Carreño va recibir más de 38.000 € pa inversiones destinaes a la meyora del mediu rural del conceyu, ente 2019 y 2020.

El Conceyu de Carreño llogra la concesión d'un nuevu paquete de fondos europeos del programa LEADER, xestionaos pola Asociación pal Desenvolvimientu Integráu del Centru d'Asturies Periurbano (ADICAP).

El Consistoriu carreñense presentó a la convocatoria d'estes ayudes dos proyectos distintos, que van movilizar una inversión total superior a los 59.000 €. Dambos proyectos fueron aprobaos, lo que supon la concesión d'una subvención total de 38.627,06 €.

El primeru de los proyectos va consistir na alquisición d'una serie de máquines y ferramientes p'ameyorar el serviciu d'obres, que van facilitar el caltenimientu, la restauración y la meyora del patrimoniu natural y del paisaxe rural del conceyu de Carreño: 1 furgoneta eléctrica, 1 minidumper y 1 segadora.

El segundu proyectu, que se va desenvolver mientres 2019, tien una índole más deportiva: va consistir na alquisición ya instalación d'equipamientos pal fomentu del ciclismu, y en particular pa la promoción de la práctica de la bicicleta de monte (BTT).

Les inversiones que se preven realizar son: taquilles pal so usu por ciclistes, un box de llavadura de bicicletes y aparcabicis (a instalar nel CIR Monte Areo, y nel Polideportivu municipal, en Candás), según dos hidrollimpiadores.

Con estos dos proyectos el Conceyu de Carreño pretende contribuyir a poner en valor el Patrimoniu cultural y el paisaxe de les parroquies rurales de Carreño, p'atraer nuevos visitantes al conceyu.