Esta selmana, empezaron les llabores de dragáu de la barra y la dársena interior del Puertu de Candás. Cuestiones éstes, llargamente demandaes tantu por profesionales del sector pesqueru como poles persones dedicaes a la pesca recreativa.

Los oxetivos d'estos trabayos son el caltenimientu y la meyora del caláu para'l pasu de les embarcaciones y la seguridá de la infraestructura local..

Los trabayos llévalos a cabu la Conseyería d'Infraestructures y Ordenación del Territoriu del Principáu d'Asturies con medios propios de la Dirección Xeneral d'Infraestructures y Tresportes, esto ye, por aciu la draga “Nalona”.

La “Nalona” ye una draga propiedá del Serviciu de Puertos, del que depende'l Puertu de Candas. Foi botada nel añu 1992, que les sos característiques son 25,80 metros d'eslora por 7,50 metros de manga. La embarcación tien una capacidá para cargar el sable dragáu d'unos 100 metros cúbicos.

Los llabores de dragáu van desenvolvese a lo llargo de cinco selmanes, dende'l 8 de mayu hasta'l 15 de xunu, aprosimao. Van Ser xornaes de trabayu de 8 hores, condicionaes, como nun podía ser d'otra forma, poles marees y condiciones meteorolóxiques.

Envalórase que la cantidá de sable y fango que se va dragar del muelle candasín va rondar los 8.000 metros cúbicos. Los cuálos van ser depositaos n'alta mar, nes coordenaes 43ª 35, 12 N; 005ª 44, 09 W.