Candás acueye una xornada sobre llicitación electrónica

El Conceyu de Carreño - en collaboración col Consorciu Asturianu de Servicios Tecnolóxicos (CAST) - entama una xornada práctica formativa sobre la Llicitación Electrónica pa Empreses na Plataforma de Contratación del Sector Públicu. Preténdese con ella informar, de forma pormenorizada, a les pequeñes y medianes empreses, y a les asesoríes que les empobinen por que nun tengan duldes a la de participar nes contrataciones qu'impulsen les alministraciones públiques al traviés de plataformes dixitales.

La Llei 9/2017, de 8 de noviembre, de Contratos del Sector Públicu, pola que se transponen al Ordenamientu Xurídicu Español les Directives del Parlamentu Européu y del Conseyu 2014/@23/UE y 2014/24/UE, de 26 de febreru de 2014, tresformó por completu los procesos de llicitación de les alministraciones públiques polo xeneral, y como nun podía ser otra manera tamién afectó a la contratación de l'alministración local. Dende'l momentu de la so entrada a valir, el Conceyu de Carreño vien afaciendo los sos procedimientos de contratación al nuevu marcu regulatorio al que tamos obligaos a cumplir y faelo según señala la normativa actual, na qu'inclúin  los procedimientos al traviés de les plataformes dixitales” señaló Amelia Fernández López – Alcaldesa de Carreño.

Un sistema de llicitación electrónica que deriva de la obligación de cumplir, nesta alministración local, cola Llei de Contratos vixente. Unos procesos a los que les entidaes locales nun tábamos avezaos, pero que nun nos quedó más remediu qu'afaenos y cumplir cola lexislación al igual que-yos asocedió a les pymes” prosiguió la Primera Edil.


Mientres esti procesu d'adaptación al nuevu marcu llegal dalgún potencial provisor local y/o provisores municipales plantegáronnos que tienen delles duldes, o poca información sobre esti nuevu procesu de llicitación. Sobremanera, nel casu, d'aquelles de menor tamañu que nun cunten con asesoríes de sofitu y que nun entendíen ónde podría consultase los contratos qu'un Conceyu taba licitando o cómo remanase pola plataforma de contratación. Pa facilitar esta información a les pymes locales, empreses provisores y públicu comenenciudu polo xeneral entamóse esta xornada” añedió Fernández.

La persona encargada d'impartir l'acción formativa, de forma desinteresada, va ser  el Director-Xerente del CAST Ángel Cabal Cifuentes. Les temes que se van encetar van ser:

• Perfil de Contratante na PLACSP
• Accesu y alta d'empreses na Plataforma Dixital
• Busca y siguimientu de llicitaciones publicaes.
• Preparación y unviada d'ufiertes electróniques.
• Otres ferramientes y servicios.
• Inscripción nel Rexistru Oficial de Licitadores y Empresa Clasificaes del Sector Públicu (ROLESCSP)

La sesión formativa por que les empreses provisores o les sos respectives asesoríes puedan afondar y consultar les sos duldes nos nuevos procedimientos de llicitación va tener llugar en Candás el próximu llunes 24 de xunu na Casa de la Cultura allugada na cai Santolaya, 9 a les 18:30 hores. Siendo la entrada llibre y gratuita hasta completar l'aforu disponible.