L'Alcaldesa de Carreño en conociendo, al traviés d'entidaes vecinales y de persones usuaries de los centros, l'anómala situación de funcionamientu de los consultorios del conceyu dirixióse a la Xerencia del Area V de salú, reclamando una solución inmediata a esta desatención por falta de facultativos  problema que ta causando alarma ente'l vecinderu. 

El Centru de Salú de Candás, dende esti 17 de xunu, tien  los sos servicios médicos al 50%, atendiéndose solamente les urxencies coles consultes ordinaries suspendíes.  Y el Centru periféricu d'El Empalme qu'atiende a la mayor parte de la población de la zona rural tien namá un facultativu pa consultes.

Por tou lo enantes espuesto,  tresllademos la nuesa esmolición y reclamamos una solución inmediata.

Compartimos, dende l'Alcaldía y equipu de gobiernu, non solo como representantes de la ciudadanía, sinón tamién como persones que vivimos nel conceyu y somos usuaries de los Servicios Públicos de Salú, a los que consideramos con arguyu una pilastra fundamental del estáu del bienestar y derechu básicu de la ciudadanía, qu'apura resolver la situación xenerada. A tal fin tratamos de mediar cola alministración rexonal pol correctu funcionamientu de los centros de salú d'atención primaria.

Una vegada en contactu cola Xerencia d'Área ésta treslladónos que nun hai disponibilidad de médicos en tou la área de Gijóan, esperando la incorporación de los tresllaos de los profesionales que progresivamente van dir ocupando les sos places, polo que nun plazu de tiempu relativamente curtiu espérase una incorporación nel Centru de Salú de Candás cola que normalizar esta situación excepcional.

Vamos llevar  un siguimientu continuu de la situación y vamos siguir aportunando coles midíes necesaries hasta que se solucione'l problema d'atención sanitaria en Carreño. Confiando qu'éstes s'adopten nel menor tiempu posible y definitivamente de manera satisfactoria pa la ciudadanía de Candás y Carreño.