El consistoriu va encetar actuaciones pa esaniciar barreres arquitectóniques en Cai Navelgas

El Conceyu aprobó les obres necesaries pa la supresión de barreres urbanístiques na cai Navelgas númberu 7  coles mires de la realización d'un itinerariu accesible dende la vía pública hasta'l pie de la rampla d'accesu al portal referíu.

L'acondicionamientu d'esti vial respuende a un pidimientu vecinal arriendes de la realización per parte de la comunidá vecinal d'una serie d'obres na so propiedá, como fueron la instalación d'un ascensor y meyores nos elementos comunes. El pidimientu vecinal treslladónos la situación na que poles característiques del vial públicu faíense necesaries una serie d'obres pa consiguir un itinerariu accesible pa toes aquelles persones que viven na cai Navelgas númberu 7” comentó Cecilia Tascón-Conceyala d'Urbanismu y Accesibilidá.

La base de partida cola qu'atopamos p'aportar al inmueble ye la esistencia d'una rampla con una inclinación del 19 % na esquina sureste y per otru llau, trés pasos na esquina nordeste del edificiu. Ente la salida de la rampla y los trés pasos atópase, al pie de la fachada esti, una cera de directriz quebrada que sigue la xeometría de la planta y con un anchor de 1.35 metros. La rasante de la cera ye horizontal, atopándose ésta a 48 centímetros per debaxo del desembarco de los pasos” señaló la Conceyala en funciones.

Énte esta situación encargóse a la Oficina Técnica Municipal la ellaboración del proyectu de les obres que diera solución a la problemática. Delles fueron les soluciones estudiaes pero en  afaciéndose a lo establecío nel  art 4.181  y 4.61 del PGO vixente y la Llei 5-1995, de 6  d'abril, de Promoción d'Accesibilidá y Supresión de Barreres del Principáu d'Asturies y del Decretu 37/2003 optóse pola solución más equilibrada. Que ye aquella qu'aprovecha al máximu los elementos esistentes y embrive les obres a realizar pa la supresión de la rampla del 19% y de los trés pasos” siguió Tascón.

D'esta miente, optóse por anular los trés pasos de la esquina nordeste, sustituyéndolos por una rampla y dimensionando l'anchu de la cera y, teniendo en cuenta les característiques de les rasantes, tresversales del conxuntu cera-zona ajardinada, plantégase l'allugamientu d'una barandiella. La zona sobre la que se va actuar atópase na vía pública, siendo de titularidá municipal. Calteniéndose'l so usu actual, non se ve incorporar nengún otru, quedando destináu por tantu al tráficu puramente piatonal, nin se preve que la intervención plantegada afecté a los árboles esistentes” reflexó la responsable de la Área.

Pero va ser necesariu ampliar la cera esistente hasta algamar un anchu llibre de 150 cm a lo llargo de too el percorríu accesible, pa lo cual prevese la execución d'un  zuncho realizáu “in–situ” con formigón armáu que con un anchor d'unos 25 cm adosáu al esistente hasta algamar un anchu total de 160 cm La nueva rampla hai de salvar unos 48 cm de desnivel, colo que pa tener una rimada máxima del 8% va ser necesariu da-y un desenvolvimientu de 6 m, 4 m per debaxo del máximu reglamentariu como máximu llargor pa cada tramu de rampla. Al entamu y al remate d'esta cuntaráse con baldoses podo-táctiles” prosiguió la Conceyala.

Finamente, y teniendo en cuenta les característiques de la rasante tresversal de la zona afectada, va ser necesariu disponer d'una barandiella, non yá na nueva rampla sinón tamién nel restu del cantu esterior del percorríu, cuidao que, na actualidá, hai un desnivel cola zona ajardinada d'unos 20 cm. Va Ser una barandiella afecha a persones con movilidá amenorgada, polo que va tener doble pasamanes y rodapié de 10 cm d'altor” remató Cecilia Tascón-Conceyala d'Accesibilidá.

Tres l'aprobación del proyectu de memoria valorada, que va rexir les obres de supresión de barreres urbanístiques, solicitáronse les ufiertes pertinentes a empreses del sector por un valor envaloráu de 15.830,72 €. Les obres van tener una duración, envalorada, de trés selmanes