Nueche de San Xuan en Carreño

Un añu más, la Sablera de Palmera de Candás, va ser l'escenariu escoyíu pa la quema de la tradicional Foguera de San Juan qu'entama'l Conceyu de Carreño en collaboración cola Asociación L’altu la lleva na nueche del domingu 23 de xunu.

Dempués del encendíu, que va ser a les 23:59 hores, la Plaza de los Hermanos Helio va acoyer, la Danza Prima. So la dirección de María Esther Vega l'alumnáu del cursu de Danza Prima y Cancioneru Popular, coyíes del deu meñique, a comuña, y faciendo la forma d'un círculu van danciar la Danza Prima. La nueche va rematar cola degustación d'una Queimada popular.

La Nueche de San Xuan ye una nueche máxica, ye una nueche na que se celebra la llegada del solsticiu del branu. Una nueche llena de ritos y tradiciones ancestrales, nel nuesu casu heredáu de la cultura celta o de les antigües fiestes paganes, onde'l  fueu y l'agua son los principales protagonistes  coles mires d'alloñar a los malos espíritos y badagüeyos de les persones y de la mesma protexeles al traviés d'estos elementos.

L'orixe del ritu d'encender una foguera va acomuñáu a la creencia qu'a partir d'esi día, cola llegada del solsticiu de branu, les nueches empiecen a ser más llargues. Polo que la finalidá d'encender una foguera esa nueche yera y ye la de dar más fuerza al sol, qu'a partir d'esi día va faciéndose más débil hasta llegar al solsticiu d'iviernu.

Pero non yá esa nueche encienden fogueres coles mires de dar más fuerza al astru rei, sinón que'l fueu esa nueche tien otru oxetivu, el de purificar a les persones que la reparen y faer sumir lo malo. Siendo tradicional n'Asturies saltar les fogueres o escribir nun papel aquello que queremos que suma y refundialo a les llapaes. Ente que nel casu de l'agua ye tradicional bañase na agua de les fontes, ríos o sableres na creencia qu'eses agües van ser bendites y van traenos salú y van protexenos de les enfermedaes o realizar l'enredáu de fontes o llavaderos. Una nueche nes que les xanes, trasgos, cuélebres,… y el restu de la mitoloxía asturiana salen a la cai y puede ser vista pol güeyu humanu.
Candás nun va ser la única parroquia que va cuntar cola so Foguera de San Xuan. L'Asociación de Festexos “La Esfoyaza” de Albandi, tres unos años nos que nun se celebraba la festividá en dicha parroquia, recuperó esta tradición milenaria. Pa ello entamó, en collaboración cola Asociación de Vecinal Santiago de Albandi y el Conceyu de Carreño, el prendíu de la foguera a les 00:00 hores, va ser nel prao de Casa Ramos.
Amás como actividá complementaria, n'honor a l'agua, van faer per primer vegada l'enramáu de dos fontes de les parroquies escoyíes al azar. Nesta ocasión les escoyíes fueron la Fonte de Casa Pachón y la Fonte del Llavaderu asitiáu detrás de Casa Peñón.

L'alcaldía emitió'l correspondiente Bandu cola ampliación d'horarios pa los establecimientos hosteleros n'esa nueche del 23 de xunu.