Esta nueva edición, que cumple 14 años, va desenvolvese, esti fin de selmana, n'antigua Fábrica d'Ortiz concretamente'l sábadu, 15 de xunu.
Van Participar un total de 274 encaxeres y dalgún encaxeru provenientes de dellos puntos de la xeografía española: Asturies, Castiella-Llión, Galicia, Cantabria,…
Amás, como n'años anteriores, va disponese d'un espaciu destináu a tiendes con productos especiales de la llabor del encaxe de boliyu.
“Trátase d'un alcuentru na villa marinera de Candás, nel que compartir esperiencies y técniques, llabores sobre este ancestral oficiu, un puntu d'alcuentru para les persones amigues de los encaxes de boliyos. Amás de poder ver cómo se trabaya n'otros llugares. Un intercambiu cultural, qu'ocupa un tiempu a favor del llabor creativo y artesanal” señaló Paula Cuervo – Conceyala en funciones de Turismu-.
“Anguaño van ser un total de 25 asociaciones les que van visitar Candás esti sábadu, onde van pasar una xornada completa na fábrica d'Ortiz desenvolviendo los sos llabores, amás 4 tiendes procedentes de Galicia, Cantabria y Castiella y Llión, van vender los sos productos, son productos bien concretos del llabor a realizar y munchos d'ellos difíciles d'atopar nel mercáu” esplicó la Conceyala.
La xornada va dar empiezu a les 10:00 hores cola recepción a les persones participantes nel Alcuentru. Ente que l'horariu d'apertura al públicu y empiezu de les llabores va ser a les 11:00, enllargándose'l mesmu hasta les 18:00 hores de la tarde del sábadu. Sacantes el momentu de la comida, de 14:00 a 16:00, l'espaciu onde se desenvuelve l'actividá, l'Antigua Fábrica d'Ortiz, va permanecer abiertu pa los y les participantes y pal públicu polo xeneral.
“Dende la Conceyalía de Turismu programáronse, nel horariu de mañana, delles actividaes por que les persones qu'esi día visítennos puedan esfrutar de la nuesa villa y conocenos un poco más. D'esta forma a partir de les 12:30 les persones comenenciudes van poder realizar una visita empuesta al Muséu Antón, a la Ruta de los Oficios, o visitar la Esposición Permanente de la Industria Conservera nel Antiguu Aljibe. Aquelles persones comenenciudes n'asistir a estes actividaes, tendrán d'inscribise primeramente nel puntu d'información turística que'l Conceyu va tener na mesma fábrica d'Ortiz” esplicó la Conceyala en funciones.
“Pela tarde, en reponiendo fuerces nos distintos establecimientos d'hostelería del Conceyu, l'actividá va siguir na fábrica a partir de les 16.00 hores. Momentu nel que va dar empiezu'l sortéu de regalos al cargu de les impulsoras del eventu, les alumnes de l'Aula de Persones Adultes de Candás. Los premios d'esti sortéu son donaos por distintos comercios y restoranes de Carreño. Tres la finalización d'esti fadrá entrega a cada persona participante del diploma acreditativu y del detalle institucional. Rematando la xornada de confraternización a les 18:00 hores” resaltó Cuervo.
“Como tolos años, estimamos dende l'equipu de gobiernu y l'oficina de Turismu de Carreño, la implicación y collaboración del grupu d'Encaxeres de Boliyos de l'Aula de Persones Adultes de Candás, que cola so profesora Maruja Jiménez al frente, faen que cada añu estos alcuentros puedan siguir celebrándose na villa de Candás” remató Cuervo.
Albandi
