El Conceyu de Carreño empecipió les obres de sustitución de les 1.819 lluminaries esistentes en Candás sustituyéndoles por nueves con tecnoloxía led.
La realización d'esti proyectu d'eficiencia y aforru enerxético ta financiáu conjuntamente ente'l Conceyu de Carreño, el 20%, y el 80% pol Ministeriu pa la Transición Ecolóxica.
El pasáu 8 de xunetu la empresa axudicataria procedió al primer cambéu de les lluminaries actuales poles nueves de leds. Un cambéu que lu va llevar 4 meses y que previsiblemente nel mes d'ochobre daráse per rematáu.
“La sustitución de les lluminaries por tecnoloxía Leds respuende al oxetivu d'algamar unos niveles altos d'eficiencia y aforru enerxético nel Allumáu esterior de la villa ameyorando'l llume de les cais, llindando la rellumada lluminosu nocherniegu o contaminación llumínica y amenorgando la lluz intruso o faela acorde a la normativa actual. Tou pa consiguir una correcta visión per parte de les persones que circulen como peatonos, según midida de seguridá paras les persones usuaries, polo xeneral, de les víes” señaló David García-Conceyal d'Obres.
“Partíamos d'unes instalaciones llumíniques, que na mayoría de los casos tienen una media de 20 años d'antigüedá y más del 96% son lluminaries con llámpares de descarga de vsap o halogenuros metálicos con equipos auxiliares y balastros electromagnéticos con altos consumos d'enerxía y con parámetros cimeros a los que recueye'l vixente reglamentu d'eficiencia enerxética. En casu de los centros de mandu, anque toos faen l'encendíu, principalmente, por célula fotoeléctrica, tamién yera necesaria la so remodelación” reflexó'l conceyal.
“Amás hai qu'añedir qu'en Candás, esiste una gran variedá de modelos de lluminaries, detectáronse hasta 116 modelos de puntos de lluz distintos, dalgunos de los cualos atópense descatalogados, lo que nos traía, per un sitiu, disponer d'un númberu elevao y variao d'unidaes de stock paráu nel serviciu d'obres pa faer frente a les sos posibles sustituciones. Asina que cola subvención llograda non yá camudamos a modelos de lluminaries más sostenibles sinón que, los distintos modelos esistentes van arrexuntase en namá 10 tipos de lluminaria facilitando asina les futuros llabores de caltenimientu. Xunificamos modelos de lluminaries y camúdense por otres más eficientes” comentó García.
“La sustitución prevista, de les 1.819 lluminaries de Candás y de los 25 centros de mandu, que les alimenten, va consistir non solo na sustitución d'estes por nueves con tecnoloxía leds, sinón que tamién va afectar a la caxa xeneral de protección, derivación individual, llínees de repartida,.. Siendo sustituyíes estes por material de fabricantes reconocíos de primer nivel como Philips o Osram. Nos centros de mandu les meyores van consistir na instalación d'un sistema contra sobretensiones, interruptores d'horarios astronómicos y un sistema de protección contra sobreintensidades transitories y permanentes con rearmamientu automáticu” prosiguió'l Conceyal.
Envalórase que con estes actuaciones de meyora llograráse un aforru y eficiencia enerxética del 77 %. Pasando d'un consumu d'enerxía añal de 1.170.250,38 Kwh/añu a 253.181,72 Kwh/añu, lo que va suponer un aforru en costu d'enerxía añal cercanu a los 137.560 €
La realización d'esti proyectu d'eficiencia y aforru enerxético ta financiáu conxuntamente ente'l Conceyu de Carreño, el 20%, y el 80% pol Institutu pa la Diversificación y l'Aforru Enerxético (IDAE), organismu adscritu al Ministeriu pa la Transición Ecolóxica, al traviés de la Secretaría d'Estáu d'Enerxía, de quien depende orgánicamente. L'ayuda que se-y concedió a Carreño, pa tal fin, enmárcase dientro del Programa Operativu de Crecedera Sostenible 2014-2020, financiáu pol Fondu Comuñal FEDER. Por aciu la puesta en marcha d'esti tipu de proyectos singulares, pretende consiguise un amenorgamientu de les emisiones de dióxidu de carbonu a l'atmósfera, por aciu la meyora de la eficiencia enerxética (como nel casu del proyectu de Carreño), la movilidá urbana sostenible, o l'usu de fontes d'enerxía anovables.
Tres el correspondiente procesu de llicitación municipal la empresa resultante axudicataria encargada de la sustitución de les lluminaries esistentes por lluminaries leds na Villa de Candás foi l'asturiana Goyastur, S.A. Xubiendo l'importe del serviciu contratáu a 871.200€.
El plazu d'execución de les meyores va ser de 4 meses a cuntar dende la firma del contratu. Coles mires de cumplir estos plazos, la empresa axudicataria escurrió un plan de trabayu, nel que lo prioritario ye entorpecer y fadiar lo menos posible al vecinderu nos sos queferes diarios.
“La sustitución de les lluminaries empezó pela zona de San Antonio en dirección al Faro. El planteamientu qu'alcordamos cola empresa ye dir dende los barrios más alloñaos del centru hasta ésti d'una forma gradual. Estos díes, por casu los dos equipos de trabayadores destinaos a estos menesteres atópense nel barriu de Piñeres y los próximos díes van pasar al barriu de la Matiella” remató David García-Conceyal d'Obres.
Albandi
