Esti finde selmana, dos carreñenses, Francisco José Díaz Cuervo, vecín del barriu d'El Montico de la parroquia de Ambás y María José Portugués Alonso, vecina de Candás, fueron  homenaxaos pola Federación de Donantes de Sangre del Principáu d'Asturies (FEDOSPA) na “X Xornada Técnica sobre Hemodonación”. 

Al actu de reconocencia al altruista llabor de les donaciones n'Asturies, en representación del Conceyu de Carreño, allegó María Rosa  Nodar Modal, Conceyala de Bienestar Social.

Donar sangre ye un actu de responsabilidá de toes aquelles persones que teniendo bona salú deseyen contribuyir a salvar la vida o recuperar la salú de los sos asemeyaos. Trátase en definitiva de compartir la salú, ensin dulda el bien más preciao del ser humanu.

Mientres la xornada Francisco José y María José recibieron la Insinia y Diploma que, a partir d'esti momentu, acredíta-yos como Grandes Donantes d'Asturies, amás del ciñu y los aplausos de les persones asistentes al actu.

“Güei foi una xornada festiva pa él y ella y  les sos families. Foi un actu bien familiar y emotivu, una amuesa d'agradecimientu p'aquelles persones que demostraron a lo llargo de la so vida'l so altruísmu, solidaridá y arrogancia ensin llendes. Una reconocencia y agradecimientu  al que públicamente l'equipu de gobiernu de Carreño quier sumase. Al igual que se lo espresemos a les homenaxaos/es tres la finalización del actu. Porque persones con esta sensibilidá escontra los demás son necesaries na nuesa sociedá, unes persones que de forma voluntaria, anónima dan lo más precioso que puede dase ensin pidir nada a cambéu, la vida” señaló María Rosa Nodal, Conceyala de Bienestar Social.

Pa ser donante de sangre namá faen falta trés requisitos: ser mayor de 18 años; pesar más de 50 Kg; y de xacíu, gociar de bona salú. La donación, pa los homes puede realizase cada 3 meses, ente que les muyeres pueden faelo cada 4 meses. Nel casu de los nuesos/es homenaxaos/es, donaron  en más de 60 ocasiones, polo que van pasar a convertise en Grandes Donantes de Sangre.

Coles mires de facilitar la donación de sangre a la vecindá de Carreño, l'Asociación de Donantes de Sangre de Xixón tresllada, dacuando, la so Unidá Móvil d'Estracciones a la villa de Candás. 

D'esta forma'l próximu 30 de setiembre, aquelles persones que deseyen donar la so sangre podránlo faer averándose al llateral del Teatru Prendes, onde tradicionalmente allúgase la unidá. L'horariu va ser de 9 a 21 hores ininterrumpidamente.