Siete Edificios Municipales, a lo llargo de los meses de xunetu y agostu, fueron oxetu d'una serie de meyores nes sos instalaciones eléctriques tres la revisión ya inspección llevada a cabu polos Organismos de Control Autorizaos (OCAS). 

En tolos edificios esisten una serie d'instalaciones que dacuando precisen d'una revisión de cuenta que en tou momentu sían segures y eficientes. Ente estes instalaciones atópense les instalaciones eléctriques de los edificios públicos. Esto esixe'l so caltenimientu, la so revisión periódica ya inspección por personal técnicu especializáu perteneciente a los Organismos de Control Autorizaos. 

“Estes inspecciones son llevaes a cabu cada cinco años polos Organismos de Control Autorizaos. Nelles verifíquense'l cumplimientu de les condiciones y requisitos de seguridá establecíos nos reglamentos de seguridá pa los productos ya instalaciones, según el Real Decreto 2200/1995 de la seguridá industrial”–señaló David García-Conceyal d'Obres.

“Nel nuesu casu esta inspección consistió, en caúnu de los edificios, na revisión de les instalaciones eléctriques en función del so usu, amás d'actualizar la documentación técnica de los mesmos en función de la normativa vixente, esto ye, el Reglamentu de baxu Tensión-REBT” –rellató'l Conceyal.

“Tres la inspección realizada pol órganu competente, la Dirección Xeneral d'Industria unviónos l'acta d'inspección periódica de la instalación eléctrica de baxa tensión, acometiendo, en base a ello, dende'l consistoriu una serie de meyores ya inversiones neses Instalaciones eléctriques coles mires de faeles más segures”  –prosiguió García 

Nestos meses de branu realizáronse les inversiones y meyores necesaries nos siguientes edificios municipales:

Los edificios de les dos Escueles rurales en funcionamientu:

Na Escuela Infantil d'El Valle .

Na Escuela Infantil de Llorgozana

Y en otros cinco edificios públicos municipales que güei tienen usos sociales y vecinales 

L'antigua Escuela de la Pedrera en Perlora, güei see vecinal.

Nes antigües Escueles del Bandín na parroquia de Carrió, güei see sociocultural d'entidaes.

Na antigua Escuela d'El Pieloro

Nel edifico de la área Recreativa de La fonte de los Ánxeles en Candás, güei usada como see vecinal pa La Matiella.

Nes antigües Escueles d'El Regueral, en Candás, convertíes na actualidá na Escuela de Sabores La Llariega y see de la entidá vecinal del barriu.

“A la de la realización de los trabayos, y dependiendo de la casuística de cada edificiu trabayamos con medios propios y esternos. Per una parte los proyectos técnicos ellaboraos por una empresa esterna, que tres la llicitación correspondiente foi axudicada a Monceme, S.L. por un importe de 5.852,14 €. Les obres de meyores de 3 de los edificios, por cuenta de les sos característiques, hubo que esternalizalos, siendo axudicaos les obres a la empresa Goyastur por un importe de 31.875,70€.  A esta inversión total de 37.727,84 € hai que suma-y les inversiones con medios propios derivaos de les obres de meyora que dende'l serviciu eléctricu dependiente del Serviciu d'Obres del Conceyu de Carreño fíxose nos 4 restantes edificios” –reseñó'l Responsable de la Área d'Obres.

“Les inspecciones reglamentaries son obligatories y una midida más de control de la seguridá de les persones y los bienes. De la mesma forma que llevamos el vehículu a pasar la revisión de la ITV dacuando, tenemos de revisar les nueses instalaciones eléctriques al traviés d'un Organismu de Control Autorizáu” –remató señaló el Conceyal d'Obres.