El Taller de Empléu “Carreño a punto” fai honor al so nome yá que el módulu d'Operaciones auxiliares d'acabaos ríxidos y urbanización, compuestu por un monitor y 15 alumnos/es trabayadores, pon a puntu les instalaciones municipales onde antes les ocupaba'l serviciu de Correos na cai Ángel Rendueles, pa rehabilitales como see de futuros proyectos de formación pal empléu.

La obra consta de la baltadera de dos tabiques, que dixebraben les antigües oficines, y l'execución d'otru nuevu tresformando los espacios nun despachu pa les actividaes alministratives y un aula de dimensiones afeches pa la formación de 15 persones.

Amás, van acondicionase los baños por que les instalaciones y los equipamientos respuendan a les midíes d'accesibilidá universal y seguridá de les persones participantes.

D'esta manera ponse en valor un espaciu públicu incorporando unes instalaciones destinaes a ameyorar la ocupabilidá de les persones demandantes d'empléu, al traviés de les futures acciones formatives.